Hanamafy ny hetsika any Toamasina

11/01/2013

Tontosa soamatsara amin’izao fotoana izao ny fananganana ny sampan tanora any Toamasina ao anatin’ny antoko MFM. Tanora MFM na T/MFM no anarana isaloran’izay ireo. Araka ny fanambarana voalohany izay nataon’ny mpitarika ny T/MFM dia fanamafisana ny tolona iaraha-manana eo an’ivon’ny ankolafy Ravalomanana no andrikitra lehibe indrindra izay atrehan’izy ireo amin’izao fotoana izao.

Fantatra ary arak’izany fa hanamafy ny hetsika eny amin’ny Kianjan’i Magro Tanambao V ao Toamasina izy ireo manomboka izao. “Ho avy izahay hanamafy ny tolona amin’izay raha nangina sy niasa mangina izahay hatramin’izay. Noho fahatsapanay fa efa tena lasa lavitra ny olan’ny Malagasy vokatry ny krizy sy ny fanoganam-panjakana efa efa-taona izao, ka mila faranana amin’izay. Nefa am-pilaminana araka ny fepetra efa napetraky ny ankolafy Ravalomanana hatramin’izay no hanaovana izany”, hoy Ranaivoarison Johnny filohan’ny T/MFM Toamasina.
Mbola ny filohan’ny T/MFM Toamasina ihany koa no nilaza fa “misokatra ho an’ny tanora rehetra ny T/MFM, satria ny tanjona ny fanomanana tanora mpanao politika tena izy tahaka ny efa nataon’ny antoko MFM izay namolavola ireo mpanao politika ankehitriny ireo”.
Raha ara-tantara dia ny MAP/KMM teo aloha ihany ity niova ho T/MFM ity. Ny taona 2002 no nijoraony voalohany teny Barikadimy, ary rantsa-mangaikan’ny MFM ihany ny T/MFM izay manana ny foibeny eto Antananarivo. Ny tanjona dia ny fanomanana tanora amin’ny sehatra politika sy ny fanovana politika izay no nanpijoroana ny T/MFM isaky ny fokontany sy ny boriborintany ao Toamasina hampitana izany fahalalana ara-politika eo amin’ny tanora izany, raha ny mpianatra teny amin’ny anjerimanontolo no nanaovan’izy ireo ny hetsika hatramin’izay.
Tsara anefa ny manamarika fa fikambanana mahaleon-tena eo anivon’ny MFM reniny ny T/MFM, na izany dia tsy maintsy hierana amin’ny foibe MFM avokoa ny fanapahana ho raisina mba tsy hivoana amin’ny foto-kevitry ny antoko hatramin’izay nijoroany teto amintsika izay. Ankoatra izay, isany handray fitenenana sy fanentanana mandritra ny hetsiky ny “zanak’i dada” ao amin’ny Magro Tanambao V Toamasina ireto “zanaky ny mafana” Toamasina ireto.