Vitsy ireo mahalala izany, hoy ny SEFAFi

20/10/2012

Na ireo parlemantera izay nindany ny lalana mifehy ny famotsoran-keloka dia maro amin’izy ireo no tsy mahalala akory ny votoatin’izany famotsoran-keloka izany. Nisongadina io fahatsapana io nandritra ny fihaonana niantsoan’ny SEFAFi ny mpandraharaha sy ny mpanao politika ary ny sendika teto Antananarivo nandritra ny atrik’asa izay nifarana omaly tao amin’ny Hotely Panorama. Naompana tamin’ny fampahafantarana ny zava-misy eto amin’ny firenena sy ny tokony ho fampiharana ny famotsoran-keloka izany fikaonan-doha nokaraakarain’ny SEFAFi izany. Tamin’ity fotoana ity ihany koa no

nampahafantarana ilay tahirin-kevitra novokarin’ity sehatra ity izay nomen’izy ireo lohateny hoe « L’impunité, l’Amnistie et la Réconciliation ». Nisongadina nandritra ity atrik’asa ity fa betsaka ireo izay tsy mahalala ny momba izany famotsoran-keloka izany sy ny mety ho fiantraikany eo amin’ny fiainam-pirenena. Samy niaiky kosa anefa ireo mpandray anjara tamin’ny atrik’asa fa manoloana izao zava-misy diavin’ny fiain’m-pirenena izao dia ilaina ny fampiharana ny famotsoran-keloka mba ho an’ny tombontsoan’ny vahoaka, na dia maro aza ireo izay nihevitra fa sarotra ny hanadinoana ny heloka vita teo anatrehan’ny firenena. Nisongadina tao amin’ity atrik’asa ity ihany koa ny fahatsapana fa tena misedra olana goavana avokoa ny Malagasy tsy an-kanavaka amin’izao fotoana izao nohon’ny krizy. Ny fahaverezan’asa sy ny fidangan’ny vidim-piainana ary ny tsy fisian’ny fandriam-pahalemana no tena isehoan’izany fasahiranana izany. Nokianin’ireo mpandray anjara tamin’ny atrik’asa ihany koa ny fihetsiky ny mpanao politika izay manararaotra ny fahefana eo am-pelatanany mba hanaovana kajikajy hijanonana eo amin’ny fitondrana.
Marihina fa fatritra maro manerana ny Nosy no efa nanaovan’ny SEFAFi izao antrik’asa izao. Isan’izany ny tany Toamasina, Toliary, Fianarantsoa. Mbola hitohy amin’ny faritra hafa toa an’Antsirabe ihany koa izany.