Mbola ilaina ve ny fisian'ny FIS ?

12/01/2013

Niteraka adihevitra teto amin’ny firenena nanomboka tamin’ny fotoana niorenany ny FIS, izay niarahan’ny kolonely Lylyson Urbain de René sy Charles Andrianasoavina natsangana ny taona 2009. Ny fihetsika nasehon’ny kolonely Charles, nandritra ny fsamborana ny filohan’ny antoko MFM, Manandafy Rakotonirina, tetsy amin’ny Carlton no niandohan’izany adihevitra izany. Tao ihany koa ny fisamborana ny senatera Naika Elianne, sns. Tsy niandry ela ny fanakianana avy amin’ireo fikambanana iraisam-pirenena toa ny Amnesty International ary nisy fotoana mihitsy aza nitsikeran’ny ambasadaoro frantsay, Jean Marc Chataigner, ny tokony hanafonana ny FIS, tamin’ny kabary nataony nandritra ny fankalazana ny 14 jolay teny amin’ny “résidence de France” Ivandry. Isan’ireo nahazo fanankianana avy tamin’ny Amnesty International sy ny Justice et paix indray koa ny FIS, nandritra ny « opération Tandroka » tany Atsimon’ny Nosy. Mipetraka araka izany ny fanontaniana, efatra taona aty aorian’ny nitsanganan’ny FIS : mbola ilaina ve ity vondrona manokana ity ?

Tambazotran-jiolahy
Nanjakazan’ny asan-jiolahy goavana notarihin’i Solovelo Régis teto an-drenivohitra sy ny manodidina nandritra ny taona maro : fanafihana mita-basy niharo vonoana olona, fakana an-keriny (kidnapping), sns. Niraviravy tànana ny mpitandro filaminana sy ny Fitsarana teo anatrehan’ny tambazotra nanenika ny faritany enina teo ambany fifehezan’i Solovelo Régis. Nigadra tao Tsiafahy ny tenany saingy noho ny taratasy manokana avy tamin’ny lehiben’ny Fampanoavana Ambony tany amin’ny taona 2007 ho an’ny talen’ny fonjaben’i Tsiafahy dia nafindra toerana tany Fianarantsoa izy ary mbola voalaza tao anatin’io taratasy io ihany koa ny tokony hamindrana azy any Toliara. Tafatsoaka nandritra izany famindran-toerana izany i Solovelo Régis ary dia niverina nandravarava indray. Efa taty amin’ny taona 2010 vao saron’ny FIS tany Toamasina izy ary nihafara tamin’ny fahafatesany izany. Marihana fa basy avy tamin’i Solovelo Régis, ilay 22 long riffle tratra tany amin’i Njaka Commando (mpanao fanafihana mitam-piadiana), saika hitifirana ny jeneraly Ravalomanana Richard.
Lehibena andian-jiolahy nikohizana teto an-drenivohitra ihany koa izany Bréchard izany ; nanafika sy nandroba ny vola be tao amin’ny ADEFI tetsy Antanimena izay namoizana ny ain’ny mpiambina, ankoatra ireo fanafihana mitam-basy maro. Toa hoe nisy fotoana mihitsy aza nialokalofan’ity olon-dratsy ity tao amin’ny Toby Ratsimandrava, tany amin’ny taona 2007 tany. Mbola nisy FIS ihany koa no nahasambotra azy efa taty amin’ny taona 2011, izany hoe efatra taona taty aorian’ny nanafihany ny ADEFI.
Tambazotran-jiolahy fahatelo anisan’ny goavana ravan’ny FIS ihany koa ny tarik’i Elysée, tompon’antoka tamin’ireo fakàna an-keriny teratany karana teto Antananarivo, Mahajanga ary iny Faritra Avaratry ny Nosy iny. Anisan’ny « asa » nokasainy ihany koa anefa ny hitifitra ny kolonely Lylyson ary tomponandraikitra ambony teto amin’ny firenena, izay nifanojo indrindra tamin’ny fitsenana ny filoha teo aloha Marc Ravalomanana voalohany iny. Tetsy an-danin’izany rehetra izany, ny fisamborana izay nihafara tamin’ny fitifirana an’i Vévé (mpanafika station d’essence sy fanafihana mitam-basy), naman’i Fab Mince (mpanao fanafihana mitam-piadiana mahery vaika) ary Tsong (mpaka an-keriny mpiara-dia tamin-dry Djaffar), sns. Mbola ny FIS ihany koa no nisambotra an’i Rivo Piso, mpanao kidnapping, izay miriaria ary karohana mafy tokoa amin’izao fotoana, taorian’ny nivoahany ny fonja.
Nangingiana mihitsy ny fanafihana mitam-piadiana tamin’ny fotoana nandraisan’ny FIS an-tanana ny ady amin’ny asan-jiolahy goavana teto an-drenivohitra. Noho ny fitsinjaran’asa teo amin’ny mpitandro filaminana, ny pôlisy sy ny zandarimaria anefa dia nalàna teo am-pelatanan’ny FIS izany andraikitra izany ka dia noraisin’ny Emmo. Tsy nisahana fisamborana sy fanenjehana andian-jiolahy goavana intsony ity vondrona manokana ity taorian’izany. Maro tamin’ny mpanara-baovao anefa no nihevitra fa teo am-pototry ny faharavany mihitsy ny tambazotran-jiolahy mpanao fanafihana mitam-piadiana mahery vaika sy ny fakàna an-keriny, nandritra ny fotoana nandraisan’ny FIS an-tanana izany andraikitra izany.
Fanafihana etsy sy eroa
Saika isan’andro ankehitriny ny fanafihana mitam-basy ary mihitsy hatrany koa ny famoizan’aina. Isan’ny ventin’ny kabary nataon’ny filohan’ny Kongresin’ny Tetezamita, Mamy Rakotoarivelo, nandritra ny lanonana teny Iavoloha ity resaka tsy fandriampahalemana ity. Ny fanjakana frantsay moa nandefa teknisiana teto an-toerana mihitsy, hanao fanadihadiana manodidina ity resaka kidnapping ity. Ankatroky ny fifidianana ary tsy maintsy hiroso amin’izany mba hivoahana amin’izao krizy izao ny firenena. Fifidianana madio, mangarahara ary eken’ny rehetra no takian’ny olom-pirenena sy ny fianakaviambe iraisam-pirenena. Antoka iray voalohany indrindra amin’izany anefa ny fandriampahalemana, koa mipetraka ny fanontaniana: mbola ilaina ve ny FIS, tokony haverina aminy ve ny andraikitra manoloana ny ady amin’ny asan-jiolahy goavana?