Tsy misy fianarana vanona satria mitete avokoa ny tafo

20/10/2012

Velon-taraina amin’izao fotoana izao ireo mpianatra sy mpampianatra ary ray amandren’ny mpianatra ao amin’ny Lycée Jacques Rabemananjara any Toamasina nohon’ny fahasimban’ny tafon’ity sekoly ity. Araka ny antso izay nataon’izy ireo nandritra ny valan-dresaka ho an’ny mpanao gazety, omaly, dia tapitra mitete avokoa ny tafon’ity Lycée ity amin’izao fotoana izao. Ho avy anefa ny vanim-potoanan’ny fahavaratra sy ny rivo-doza. Mety ho voatoitoina arak’izany ny fianaran’ireo mpianatra any amin’izany sekoly izany, raha tsy misy ny fandraisan’andraikitra.

Tandindonin-doza ny taom-pianaran’ireo mpianatra ao amin’ny Lycée Jacques Rabemananjara any Toamasina. Araka ny antso avo izay nataon’ny Ray aman-dRenin’ny mpianatra any an-toerana sy ireo mpampianatra mpanabe ao amin’izany sekoly izany dia tapitra mitete ary rovitra avokoa ny tafon’ity toeram-pampianarana ity. Toy ny any an-tokotany arak’izany ireo mpianatra rehefa avy ny orana. Tsy vitan’izany fa maniteraka hatrany amin’ny rihana ambany ihany koa ny rano satria efa tsy mahatazona izany ny gorodona. Izany hoe na ireo efitrano fianarana any ambany rihana, na ny any ambony rihana dia samy dobon’ny rano avokoa. Raha tsorina dia efa tolan’ny fahanterana tanteraka ity lycée ity amin’izao fotoana izao na dia mbola mijoro aza, ary tsy azo hianarana intsony raha tsy misy ny fanarenana.
Araka ny fanazavana avy amin’i Marie Louise Nirina, proviseur ao amin’izany Lycée izany, dia kely ary tsy mahavita n’inon’inona amin’ny fanarenana ilaina amin’ity sekoly ity ny anjara fanampiana avy amin’ny governemanta. Ho an’ny Lycée Jacques Rabemananjara manokana dia tsy nisy afa-tsy ny fanarenana ny efitrano fianarana iray izay simba vokatry ny fianjeran’ny hazo taminy no nampiasana ny vola avy amin’ny ministera.
Nomarihan’izy ireo nandritra ny valandresaka ho an’ny mpanao gazety izay nataony omaly tany Toamasina fa hiditra amin’ny vanim-potoanan’ny fahavaratra sy ny vanim-potoanan’ny rivo-doza isika eto Madagasikara amin’izao fotoana izao, indrindra iny faritra antsinanana iny. Manahy mafy ny amin’ny tsy ahavanona araka ny tokony ho izy ny fianaran’ny mpianatra ao amin’izany sekoly izany izy ireo noho izao fahasimban’ny tafotrano izao.
Marihana fa misy mpianatra 3000 mahery ao amin’ny Lycée Jacques Rabemananjara amin’izao taom-pianarana izao. Ity toeram-pampianarana ity no hany Lycée tokana tantanan’ny fanjakana ao antampon-tananan’i Toamasina. Ankoatr’izay dia sekoly tantanan’ny tsy miankina amin’ny fanjakana avokoa no misy any an-toeranana. Misy rihana roa ny Lycée Jacques Rabemananjara. 20 metatra eo ho eo tsy lavitra ny moron-dranomasina no misy azy. Izay toerana iorenany izay no mampalaky ny fahasimban’ny tafony.
Miantso ny fitondram-panjakana hijery akaiky ny fanarenana ity sekoly ity ireo Ray aman-dRenin’ny mpianatra sy ny mpanabe any an-toerana.