Tafiditra ao anaty kizo tanteraka

12/01/2013

Miandry izay fanambarana hataon’ny filohan’ny Tetezamita amin’ny fahatongavany, androany, avy any Tanzania ny mpanara-baovao. Isan’ny andrasan’ny rehetra amin’izany ny filazany na hilatsaka na tsia amin’ny fifidianana filoham-pirenena ny tenany. Raha arak’iny fintsoana azy maika nankany Dar es Salaam iny dia efa manana ny heviny ireo fianankaviambe iraisam-pirenena, indrindra taorian’iny lahateny nataon’ny Filohan’ny tetezamita iny. Porofo ilazana fa manana ny ambarany amin’ny raharaha eto Madagasikara ny Fianankaviambe iraisam-pirenena, ary tsy marina ny filazana fa afa-miala amin’izy ireo isika.

Tsy ampy herinandro akory izay ny nanambaran’ny Filohan’ny tetezamita fa tsy azon’ny firenena avy any ivelany terena amin’ny safidiny ny Malagasy. Omaly anefa dia lasa tampoka tany Dar es Salaam ny tenany ary, araka ny fampitam-baovao avy amin’ny fiadidiana ny tetezamita dia ny fanohizana ny fifandresen-dahatra eo aminy sy ireo tompon’nandrikitra ambony ao amin’ny SADC no anton’izany dia izany. Midika izany fa tsy afa-miala amin’ny fianankaviambe iraisam-pirenena i Madagasikara, indrindra amin’ny raharaha mahakasika ny famahana ny krizy misy eto amin’ny firenena amin’izao fotoana izao. Marihina fa sarotra ho an’ny mpanara-baovao ny hino fa nandeha an-tsitra-po tany Dar es Salaam ny filohan’ny tetezamita. Ho an’ny mpanara-baovao maro dia nampiantsoin’ny SADC ny tenany, indrindra taorian’ilay fanambarana izay nataony teny Iavoloha nandritra ny fifampiarahabana tratry ny asaramanitra farany teo. Tsiahivina fa ankoatry ny resaka mahakasika ny fifandraisan’i Madagasikara amin’ny fianankaviambe iraisam-pirenena dia isan’ny tsikaritra tamin’ny lahatenin’ny filohan’ny tetezamita ihany koa ny fikasany hisisika ny hilatsaka ho fidina ho filoham-pirenena . Tsy tokony handino anefa fa tsy ankasitrahan’ny fianankaviambe iraisam-pirenena ny filatsahany ho fidina.
Sokina nanani-bato
Toy ny sokina nanani-bato arak’izany ny filohan’ny tetezamita amin’izao fotoana izao, ary azo heverina ho toy ny efa enjehin’ny teny nataony ny tenany satria na hilatsaka izy na tsia dia samy loza mitatao aminy sy amin’ny firenena avokoa izany. Ny fiziriziriny hilatsaka ho fidina filoham-pirenena dia midika avy hatrany ho fananganana ady amin’ny fianankaviambe iraisam-pirenana. Tranga izay hampitondra faisana ny vahoaka Malagasy sy ny firenena manontolo satria miankina betsaka amin’ny fiaraha-miasa amin’ny fianankaviambe iraisam-pirenena ny toe-karem-pirenena. Tranga ihany koa izay mety tsy aha-mari-toerana ny fitondrana ho izay hitsangana eo. Tsara ny manamarika fa araka ny efa nambaran’ny mpiandraiki-draharahan’ny firenena Alemana eto amintsika dia mety hamela an-dRavalomanana ny hilatsaka ho fidina indray ny fianankaviambe iraisam-pirenena raha toa ka mikiribiby ny hilatsaka ny filohan’ny Tetezamita. Mbola tantara hafa ihany koa anefa ny fandresen-dahatra ny Malagasy amin’izany fifidianana izany satria raha tarafina amin’ny fahantram-bahoaka sy ny firongatry ny tsy fandriam-pahalemana ary ny kolikoly amin’izao fotoana izao dia sarotra ny hino fa hifidy azy ny Malagasy.
Raha ny mifanohitra amin’izay indray anefa no hitranga, dia tsy isalasalana fa mbola loza mitatao ihany koa satria efa maro ireo vava nataon’ny Filohan’ny tetezamita izay mety hamatotra azy amin’ny fotoana tsy maha eo amin’ny fitondrana azy intsony, raha tsy hiteny afa-tsy ny mikasika ny fiverenana an-tanindrazan’ny filoha teo aloha isika. Tranga izay hanova tanteraka ny zava-misy sy ny fijery politika eto amintsika, raha tsy hiteny afa-tsy ny raharaha samihafa mbola ifanenjehan’ny an-daniny sy ny an-kilany amin’izao fotoana izao isika. Isan’ireny ny raharaha 7 febroary, ny raharaha 26 janoary, sy ny raharaha hafa izay ifampiampangana amin’izao fotoana izao.