Ny Profesora Panja Ramanoelina no filoha vaovao

12/01/2013

Tontosa omaly ny fifidianana ny filohan’ny Oniversiten’Antananarivo. Ny Profesora Panja Ramanoelina no nivoaka ho mpandresy tamin’izany fifidianana izany rehefa nahazo ny vato be indrindra tamin’ireo mpifidy. Izy indray izany no hitondra ny Oniversiten’Antananarivo amin’ny telo taona ho avy. Niova fenitra ny Oniversité. Izay avokoa ny feo re teny amin’ny biraon’ny fiadidiana ny Anjerimanontolo teny Ankatso taorian’ny fahavitan’ny fifidianana ny filoha vaovao. Araka ny vokatry ny safidin’ireo mpampianatra sy mpandraharaha teny amin’izany toeram-pampianarana ambony izany dia ny Profesora Panja Ramanoelina indray no filoha vaovao hitantana ny oniversité mandritra ny telo taona manomboka izao. Omaly no natao izany fifidianana izany.

Mpandraharahan’ny Oniversite arivo mahery sy mpampianatra maherin’ny fitonjato no nandrotsa-bato tamin’izany fifidianana izay nanomboka tamin’ny valo ora maraina izany. Tamin’ny telo ora tolakandro kosa no nifarana ny latsa-bato sy nanomboka ny fanisana.
Isan’ny fanambin’ny filoha vaovaon’ny Oniversité ny fametrahana fandrindrana mba tsy hisian’ny fahatarana intsony amin’ny fandohavana ny karaman’ny mpandraharahan’ny oniversité. Ankoatr’izay dia isan’ny fanamby napetrany ihany koa ny hametrahana ny fahaiza-mitantana sy ny mangarahana ary ny fametrahana ho toeram-pampianarana filamatra ny Oniversiten’Antananarivo.
Tsara ny mampatsiahy fa efa nisahana ny andraikitra maha minisitry ny Fambolena sy Fiompiana ary Jono teo anelanelan’ny taona 2008 ka hatramin’ny taona 2009, izany hoe tamin’ny fitondrana Ravalomanana, ny Profesora Panja Ramanoelina. Efa lehiben’ny departemantan’ny Indostria sy ny fambolena tao amin’ny oniversiten’Antananarivo ihany koa ny tenany teo anelanelan’ny taona 1994 ka hatramin’ny taona 2002, ary efa talen’ny ESSA tamin’ny taona 2002 ka hatramin’ny 2008. Marihuana fa efa 30 taona no niasan’ny Profesora panja Ramanoelina teo amin’ny sehatry ny fampianarana ambony, ary maro ihany koa ireo sehatra efa nahafantarana azy teo amin’ny tontolon’ny fikarohana taty amin’ny ranomasimbe indianina sy eo an’ivon’ny tany mampiasa ny teny Frantsay n any Francophonie.