Hanao fitokonana faobe indray

20/10/2012

Raha somary tsy re ireo mpampianatra mivondrona ao amin’ny Sempama nandritra ny fotoana lavalava dia fantatra indray izao fa manomboka mihetsiketsika ry zareo amin’izao fotoana izao. Nisy ny taratasy mirakitra ny tenimita ho an’ny mpikambana avy amin’izany sendika izany izay milaza fa hiroso amin’ny fitokonana faobe fanairana ny firenena manontolo ry zareo. Midika izany fa mbola tsy nahazo fahafaham-po tamin’ny fitakiana izay nataony ireo mpampianatra Sempama manerana ny Nosy. Tsy voafaritra tao anatin’izany tenimita izany kosa ny fomba hanatontosan’izy ireo

izany hetsika izany. Hifanindran-dàlana amin’izao fanombohan’ny taom-pianarana izao ny fanohizan’ireo mpampianatra ao amin’ny Sempama ny hetsika fitakiana izay efa nataon’izy ireo hatramin’ny taom-pianarana teo aloha. Araka ny taratasy tenimita izay nalefan’ny filohan’izany sendika izany ho an’ireo mpikambana rehetra dia hanatontosa fitokonana faobe fanairana ny firenena izy ireo manomboka izao. Tsy voafaritra mazava tsara tao anatin’ity fampitam-baovao ity kosa ny votoatin’izany hetsika hataon’ny Sempama manerana ny nosy izany. Saingy nomarihan’ny filohany fa nohon’ny famadihan’ny minisitry ny Fanabezam-pirenena ho amin’ny tombontsoany ny fitakiana nataon’izy ireo sy ny fampizarazarana ny samy mpanabe mba hiarovany ny tenany no isan’ny antony nahatonga izany fanampahan-kevitr’izy ireo izany. Nambaran’ny fampitam-baovao ihany koa fa adidy sy andraikitra tsy maintsy iantsorohan’ny Sempama ny fanohizana ny tolona mba ho fametrahana ny Fampianarana sy ny Fanabeazana eto amin’ny firenena ho amin’ny toerana sahaza azy.
Tsiahivina fa nisy akony goavana teo amin’ny fampizorana araka ny tokony ho izy ny raharaham-pampianarana tamin’ny taom-pianarana lasa ny fitokonana nataon’ny Sempama, raha tsy hilaza afa-tsy ny fanemorana ny datim-panadim-panjakana isika. Fanemorana izay niteraka fikorontanana teo amin’ny tontolon’ny fampianarana, indrindra ho an’ireo sekoly tsy miankina. Isan’ny akon’ny fitokonana nataon’ny Sempama tamin’iny taon-dasa iny ihany koa ny tsy fahavitan’ny fandaharam-pianarana tany amin’ireo lakilasy maro manerana ny Nosy. Marihina fa tsy vitsy ireo mpampianatra izany nitokona no nahazo sazy tamin’ny ministera. Isan’ny sazy tena lehibe indrindra tamin’izany ny fanapahana ny karaman’izy ireo.
Tsy isalasalana arak’izany ny milaza fa mety hitondra korontana vaovao eo amin’ny tontolon’ny fampianarana indray ny fisian’ny hetsika vaovao ataon’ireto mpampianatra Sempama ireto.