Niaka-tsehatra ny “zanaky ny mafana

14/01/2013

Niavaka tsy toy ny fahita an-davan’andro ny hetsiky ny Ankolafy Ravalomanana ny sabotsy teo, tao amin’ny Magro Tanambao V. Tonga maro ary nanome endrika manokana ny fotoana tamin’io andro io ireo tanora MFM any an-toerana. Nanome endrika manokana ny hetsika ihany koa ny fandraisam-pitenenan’izy ireo nandritra ny fivoriana tamin’ity indray mitoraka ity. Nambaran’ny filohan’ny tanora MFM, Ranaivoarison Johnny, fa mila ny tanora ny fitakiana ny ara-dalàna sy ny tsy fanekena ny fanonganam-panjakana hatao fitaratra eto amin’ny firenena I Madagasikara. Nitaona ny tanora hijoro ary tsy ho kivy ny tenany, indrindra manoloana ny fitakiana ny marina satria “ny marina tsy mba maty ary ny nahary tsy tia ny mpanao ratsy izany”.

Isan’ireo nandray fitenenana tamin’ity hetsika ity ihany koa ny mpikambana ao amin’ny Kongresin’ny tetezamita Rakotoarimanana Justin. Nahintsy ny lahateny nataony raha nanambara fa “telo sy iray ny baolina izao, ny filohan’ny tetezamita irery izao no miady amin’ny filohan’ny andrimpanjakana telo. Main’ny afo nantsangany I Rajoelina ankehitriny ka efa miteniteny foana ka ny vondrona iraisam-pirenena avy izao no hamakiany ady”.
Ho an’i Iandro Robertson kosa dia nilaza tenany fa raha misisika ny hirotsaka ho fidiana I Rajoelina, dia mitaky ny hirotsahan’ny filoha teo aloha Ravalomanana ihany koa ny Ankolafy Ravalomanana satria ny vahoaka Malagasy no mitaky ny filatsahany izao noho ny fizirizirin’ny filohan’ny FAT. Marihina fa ireo rehetra izay nandray fitenenana tamin’ity hetsika tao amin’ny Magro Tanambao V Toamasina ity dia samy nanentana ny vahoaka ny hiomana sy ho vonona lalan-dava satria efa atomotra ny fiverenana an-tanindrazan’ny filoha teo aloha Ravalomanana. Voalaza fa ny filazany manokana ny fahatongavany sisa andrasana dia ho tsenaintsika am-panajana sy am-boninahitra ny fahatongavany sy ny fianakaviany eto an-tanindrazana miaraka amin’ireo naira-nanao sesi-tany politika ny tenany tany ivelany.
Ankoatra izay dia fantatra ihany koa fa manomana hetsika goavana eo amin’ny tokontanin’ny Magro Tanambao V amin’ny sabotsy izao ny ankolafy Ravalomanana. Hifanandrify amin’io hetsika io no fantatra fa hanao be midina any Toamasina hitokana ny zava-bita “manaram-penitra” ny ekipan’ny filohan’ny tetezamita.