Hanao fanambarana androany

14/01/2013

Hamory ny mpanao gazety eto Antananarivo, androany, ny Birao maharitry ny SADC eto amintsika. Mandritra izany no hanambaran’izy ireo ny tatitry ny fivorian’ny Troika izay natao tany Dar es Salaam ny faramparan’ny herinandro lasa teo. Tsiahivina fa nantsoin’ny Troika hanatrika ny ampahany tamin’izany fivoriana izany ny filohan’ny tetezamita Andry Rajoelina. Teo am-pahatongavana avy nanatrika izany fihaonana izany dia efa nilaza ny fahitany izany Filohan’ny Tetezamita. Nambarany fa afa-naneho ny heviny teo anatrehan’ireo filoham-panjakana nivory nandritra izany fotoana izany ny tenany. Isan’ny voaresaka, hoy izy ny miksaika ny fahafahany sy ny fahafahan-dRavalomanana milatsaka na tsia amin’ny fifidianana filoham-pirenena.

Nambarany ihany koa fa niaiky ireo filoham-panjakana nanatrika teo fa manana ny fahaleovan-tenany tanteraka amin’ny fanendreny izay ho mpitarika azy. Momba ny tenany manokana dia nilaza ny filohan’ny tetezamita fa mbola hifampidinika amin’ireo mpiara-dia aminy ny tenany alohan’ny hanapahany hevitra ny hilatsaka na tsia amin’ny fifidianana. Nampanantena ihany koa ny tenany fa hanambara tsy ho ela izany fanampahan-keviny izany. Farany dia isan’ny nambaran’ny filohan’ny tetezamita ihany koa ny faneken’ny SADC ny tsy hanemorana ny fifidianana kasaina hatao eto Madagasikara amin’ity taona ity.

Marihina fa andrasan’ny mpanara-baovao maro ny mety ho votoatin’ity fanambarana hataon’ny Birao maharitry ny SADC eto Madagasikara ity, indrindra taorian’ilay fiantsoana an-dRajoelina tany Dar es Salaam sy ilay lahateny nataony teny Iavoloha nandritra ny fifampiarahabana tratray ny taona teo amin’ny andrim-panjakana sy ny masoivoho vahiny. Tsy vitsy tokoa ny nilaza fa mety tsy nahafaly ny fianankaviambe iraisam-pirenena ny votoatin’iny lahateny iny indrindra fa ny filazana fa tsy mila ireto farany ny firenena Malagasy. Mbola isan’ny andrasan’ny mpanara-baovao maro ihany koa ny fahamarinan’ny filazana fa mety hiverina amin’ny fanampahan-keviny ny fianankaviambe iraisam-pirenena, arakaraka ny fanampahan-kevitry ny filohan’ny tetezamita manoloana ny filatsahany ho fidina filoham-pirenena. Izany hoe ny famelana indray ny filoha teo aloha hilatsaka ho fidina filoham-pirenena raha toa ka tapa-kevitra ny hilatsaka ny filohan’ny tetezamita. Ary farany dia isan’ny antony iandrasan’ny mpanara-baovao an’ity fanambarana hataon’ny SADC ity ny mahazava-dehibe izany amin’ny mety ho fandraisana fanampahan-kevitra amin’ireo mpiara-miombon’antoka izay efa mandrangaranga ny hiala tanteraka amin’ny fiaraha-miasa amin’i Madagasikara amin’izao fotoana izao.