Nisaran-dalana ny TGV sy ny MDM

15/01/2013

Niarahaba ireo masoivoho vahiny ary ireo vondrona iraisam-pirenena monina sy mipetraka eto Madagasikara, tratry ny taona 2013, tetsy amin’ny Carlton Madagascar, ny ministry ny Raharaham-bahiny, Pierrot Rajaonarivelo mivady. Nisongadina nandritra ny kabary nataon’ny filohan’ny antoko MDM tamin’izany fa mila ny fanampian’ny fianakaviambe iraisam-pirenena ary tsy afaka ny hitoka-monina manoloana ny famahana ny krizy ny Malagasy na dia misy aza ireo minia mandà sy mitsipaka izany. Nivohitra nandritra ny lahatenin’ny ministry ny Raharaham-bahiny fa ny fampanjakana ny demôkrasia sy ny fitondrana tsara tantana no anisan’ny antoka lehibe andrasan’ny fianakaviambe iraisam-pirenena handraisan’izy ireo anjara amin’ny fanampiana an’i Madagasikara hivoaka amin’izao krizy izao. Nosinganiny manokana tamin’izany ny SADC, ny COMESA, ny vondrona Eoropeana, ny vondrona Afrikana, ny N.U, ny OIF ary ny COI na dia ireo aza ireo fihetsika ataon’ny sasany etsy sy eroa amin’izao ankatroky ny fifidianana izao. Voafaritra mazava ao anatin’ny Tondrozotra, araka ny voalazan’ny toko I, andininy faha-8 rahateo koa moa ny tsy maintsy hametrahana fitantanan-draharaham-panjakana azo antoka hiantoka ny hisian’ny fifidianana madio sy mangaraharaha.

Nasian’ny minisitra tsindrim-peo manokana ihany koa ny voalazan’ny toko faha-III ao amin’ny Tondrozotra, mikasika ny famelan-keloka ho an’ireo rehetra voakasiky ny krizy 2002 sy 2009. Tsy mbola nasian’ny filohan’ny Tetezamita, Andry Rajoelina, resaka nandritra ny Filan-kevitry ny minisitra mihitsy anefa izany, hoy hatrany ny minisitra Pierrot Rajaonarivelo. Namerina nampahatsiahy ny voalazan’ny andiny faha-43 ao amin’ny toko faha-IV ny Tondrozotra ny ministry ny Raharaham-bahiny. Voalaza ao anatin’izany mantsy ny handraisana sazy ho an’izay rehetra minia mandika ny fifanekena izay efa navadika ho lalàna hifehy izao Tetezamita izao, dia ny Tondrozotra izany. Natsidiky ny filohan’ny antoko MDM tamin’izany moa ny fanapahan-kevitra noraisin’ny SADC ny amin’ny tsy tokony hilatsahan’ny filoha teo aloha Marc Ravalomanana sy ny filohan’ny Tetezamita Andry Rajoelina.
Atsimo sy avaratra
Tsy takona nafenina nandritra iny lanonana fiarahabana tratry ny taona ho an’ireo masoivoho tetsy amin’ny Carlton iny fa nisara-dalana tanteraka ny filohan’ny antoko TGV sy ny MDM. Mifanao atsimo sy avaratra ny kabary nataon’ny filoha Rajoelina teny Iavoloha sy ny kabarin’ny minisitra Pierrot Rajanaonarivelo tetsy amin’ny Carlton. Raha niompana bebe kokoa tamin’ny fitanisana ireo « zava-bitany » sy ny « maha izy azy » ny filohan’ny Tetezamita, namaky ady tamin’ny fianakaviambe iraisam-pirenena rahateo, dia ny fanatsarana ny fifandraisana eo amin’i Madagasikara sy ny fianakaviambe kosa ny an’ny ministry ny Raharaham-bahiny. Raha mbola nijanona teo amin’ny fihantsiana ny hafa sy ny fanohizana ireo tetikasa heveriny hambaboana vahoaka ny filohan’ny HAT, dia ny fampiharana ireo andininy maro voalazan’ny Tondrozotra hirosoana amin’ny fifidianana ny an’ny filohan’ny MDM. Raha mbola fanamafisana ny jadona sy ny fanitsakitsahana ny demôkrasia no lahatenin’ny filohan’ny Tetezamita, dia firariana ny hisian’ny tena demôkrasia sy ny fanjakana tsara tantana kosa ny an’ny minisitra Pierrot Rajaonarivelo. Nazava tsara tamin’ny alalan’ny kabarin’izy mirahalahy ireto ny manana fahavonana hivoaka amin’izao krizy izao ary ny minia mifikitra amin’ny sezany sy matahotra ny hiatrika ny fitsaram-bahoaka, dia ny fifidianana izany. Fehiny, efa mifantoka amin’ny fifidianana sy izay fomba ahafahana manatanteraka azy avokoa ny antoko politika rehetra manana rafitra sy fototra manerana ny Nosy. Misy anefa ireo izay mitady hevitra hafa mifanohitra amin’izany. Iza no tsy mahalala fa na ny CENI-T izay miantoka ny fanomanana ny fifidianana aza tsy afaka ny hiasa ara-dalana raha tsy misy ny fanampiana ara-pitaovana, indrindra ny ara-bola avy amin’ny fianakaviambe iraisam-pirenena. Ny fihantsiana ady amin’izy ireo dia midika ho fisakanana ny fanomezan-tanana, izany hoe mba tsy hisian’ny fifidianana madio sy mangarahara ary eken’ny rehetra.