Noroahan’ny tompon-tany ny vahiny

15/01/2013

Taorian’ny tranga manana endrika fankahalana vahiny tany Toliara tamin’ny faran’ny herinandro lasa teo dia fa,tatra ihany koa amin’izao fotoana izao fa mandroaka ireo vahiny izay mbola mitrandraka safira any amin’ny faritr’i Didy ny fokonolona any an-toerana. Nanangana barazy tsy afahan’ireo mpanam-bola mikasa hividy safira ho avy any an-toerana ihany koa izy ireo amin’izao fotoana izao. Nisy ny fanambarana nataon’ny ben’ny tananan’i Didy izay nilaza fa hidina hatrany anatin’ireo toeram-pitrandrahana handroaka ireo olona mbola mitrandraka ao ry zareo amin’ity herinandro ity, miaraka amin’ny mpitandro filaminana.

Mafanafana indray ny toe-draharaha ao Didy ao hatramin’ny faran’ny herinandro lasa teo, ary manahy mafy amin’ny mety hisian’ny fifandonana eo amin’ny mpihavy sy ny mponina any an-toerana ny mpanara-baovao. Nandritra ny fivoriam-pokonolona izay natao tamin’ny asabotsy teo tao an-tampon-tananan’i Didy no nahafantarana fa velon-taraina amin’ny fihetsik’ireo mpiavy izay tondroin’izy ireo ho manjakazaka amin’ny fitrandrahana safira ao amin’ilay toerana misy izany fitrandrahana izany any Didy ny fokonolona any an-toerana. Nandritra izany fivoriam-pokonolona izany ihany koa no nandraisan’izy ireo fepetra handroaka ny mpitrandraka rehetra, indrindra ireo vahiny avy any amin’ny faritra samihafa tonga any an-toerana amin’izao fotoana izao. Nametraka sakana (barazy) eo amin’ny tanana iray atao hoe ao Antsevabe, ihany koa ny fokonolona. Sakana izay handrarana ny mpihavy, indrindra ireo mpanam-bola izay hividy safira any amin’izany toerana izany, tsy hiditra any an-toerana. Tamin’ny fotoana nandalovan’ny mpanao gazetin’ny La nation tany Antsevabe dia efa maro dia maro ireo fiarakodia tsy mataho-dàlana na 4X4 izay tsy tafavoaka teo amin’ny sakana izay natsangan’ny fokonolona tao Antsevabe. Mpividy safira avokoa moa ny ankamaroan’izy ireo.
Marihina fa ireo mpitrandraka safira avy any avaratra no tena mahavelon-taraina ny mponina any an-toerana. Velon-taraina toy ireo mponina any Didy noho ny fihetsiky ny mpiavy avy any avaratra ihany koa ny mpiavy any any atsimo.
Nanao antso avo ho an’ireo vahiny arak’izany, mba hiala haingana dia haingana any amin’izany faritra izany ny ireo fokonolona tany an-toerana, nandritra ny fivoriam-pokonolona tamin’ny asabotsy teo. Efa am-polony arak’izany ny nandao ny tananan’i Didy tamin’io asabotsy io ihany. Nanambara ihany koa izy ireo fa hidina ifotony mihintsy, miaraka amin’ny mpitandro filaminana avy ao amin’ny borigadin’i Didy sy ny tompon’nandrikitry ny Ala sy ny tontolo iainana any an-toerana, mba handroaka ireo mpitrandraka rehetra any amin’izany toerana izany. Marihina fa araka ny fanazavan’ny ben’ny tanana dia voarara ny mitrandraka safira ao amin’izany toerana izany, araka ny fanampahan-kevitra efa noraisin’ny fitondram-panjakana tetezamita. Tokony hanaraka izany avokoa araka ny antso avo nataony ny rehetra.
Adim-poko?
Hatreto dia tsy misy aloha ny fifandonana mivantana n any fihetsika izany ahitana taratra ny fisian’ny adim-poko any amin’ity faritra ity. Mampametram-panontaniana kosa ireo tranga niseho tamin’iny faran’ny herinandro iny sy ny mety ho fifandraisan’izany amin’izao raharaham-pirenena izao, indrindra ny firongatry ny fankahalana vahiny tany amin’ny faritra hafa. Ny fanontaniana mipetraka dia ny hoe: tongatonga ho azy ve izao hetsika mamofompofona fankahalana vahiny izao? Ary raha sanatria ka izany tokoa no zava-misy dia iza marina ny mety hahazo tombontsoa amin’izany? Indrindra fa amin’izao fotoana hirosoana amin’ny fifidianana sy ny fametrahana fitoniana eto amin’ny firenena amin’izao fotoana izao?
Mbola fanontaniana mipetraka ihany koa ny mikasika ny fitrandrahana safira any amin’ity faritra ity. Raha araka ny fantatra dia efa nisy ny hetsika goavana nataon’ny mpitandro filaminana tamin’ny fandroahana ireo mpitrandraka tany an-toerana. Amin’izao fotoana izao anefa dia toa marina ny filazan’ny mpanara-baovao izay nanambara fa ireo mpitrandraka madinika ihany no noroahina fa ireo mpitrandraka vaventy kosa mbola manohy ny asany ihany. Porofon’izany ny fisian’ireo mpividy vato vahiny izay mbola tamana any amin’iny faritra iny hatramin’izao. Sarin’ady nandroahana ny madinika ihany arak’izany ny fanadiovana nataon’ny mpitandro filaminana nalefa tany an-toerana tamin’ny fotoan’androny.