Hosamborina manomboka izao

15/01/2013

Nandraisan’ny mpitandro filaminana fanampahan-kevitra nandritra ny fivoriana fanao isan-kerin’andro niarahan’ireo tomponandraikitry avy amin’ny Tafika, ny Zandarimariam-pirenena ary ny Polisim-pirenena omaly 14 janoary 2013 ny ady amin’ny sinto-mahery sy ny asan-jiolahy eto Andrenivohitra.

Tapaka nandritra izany fivoriana izany ary fa tsy azo atao intsony ny mividy volamena tsy ara-dalàna eny amoron-dalana satria mampitombo ny sinto-mahery izany. Toy izany koa ny fivarotana na fanaovana fanamiana miaramila na mitovitovy aminy ka heverina ho jiolahy izay mbola minia manao izany satria ireny no entin’izy ireo manafika. Ny mpitandro filaminana ihany koa dia tsy mahazo manao fanamiana raha tsy miasa ary tsy azo atao ny fanamiana tsy ara-dalana sy miafinafina ( tenue panachée). Tapaka ihany koa fa haverina ny “ Patrouille militaire” (PM ) handeha amin’ny fiara Emmo-Securité ka tsy hisy fandeferana izay mbola minia mandika an’ireo fa samborina avy hatrany.
Ankoatr’ireo dia mbola nasiana tsindrim-peo ny fanajana ny lalàna mifehy ny fifamoivoizana, indrindra ho an’ny mpitandro filaminana izay hita fa tsy manao “casque” raha mitaingina moto, tsy manao “ ceintnure de securité” rehefa mitondra fiara.
Marihina fa nisy ihany koa ny tatitra momba ny asan-jiolahy izay nentina tamin’ity fivoriana ity. Fantatra ary fa nisy 09 ny tranga niseho, 17 ireo voasambotra ary jiolahy 02 maty voatifitra, 01 naratra. Nisy 05 ihany kosa ny mpitandro filaminana naratra ary 03 ny fokonolona, raha fokonolona 02 hafa namoy ny ainy noho ny asan-jiolahy. Ny halatr’omby indray : nisy tranga 11 manerana ny Nosy izay nahaverezana omby miisa 841 ka ny 150 tamin’ireo no tafaverina tamin’ny tompony. Nahatratra 12 ny dahalo maty, tsy nisy kosa ny mpitandro filaminana raha nisy 02 ny fokonolona namoy ny ainy.
Mitohy ny ezaka izay mbola anentanana ny fahatsiarovan-tenan’ny tsirairay. Ireto avy ny laharana maintso maimaimpoana iantsoana vonjy raha misy ilàna izany: Ny an’ny Zandarimariam-pirenena: 305 (TELMA-AIRTEL-ORANGE), 119 AIRTEL ary efa hiasa tsy ho ela ihany koa ny 119 TELMA izay hivantana avy hatrany amin’ny Tobin’ny Zandary ao amin’ny Disrika akaiky indindra ny mpiantso.