Tsy mila an-dRajoelina ny mpiasam-panjakana

16/01/2013

Nanatanteraka valan-dresaka ho an’ny mpana gazety tetsy amin’ny CLT Tsiadana ny F3M na Fiaraha-mientan’ny mpiasam-panjakana Malagasy. Nambaran’izy ireo tamin’izany fa manome 48 ora ny fitondrana izy ireo handray fanapahan-kevitra manoloana ireo fitakiana izay efa nahazo ny fankatoavan’ny Filan-kevi-panjakana, momba ny fampitoviana ny karaman’ny mpiasam-panjakana (alignement de la grille indiciaire) izay tsy mbola nisy valiny hatramin’izao. Dila io fe-potoana voalaza io dia hiroso amin’ny fampikatsoana sy fikomiana (désobéissance) tanteraka amin’izay ny mpiasam-panjakana, araka ny nambaran’ny mpandrindra ao amin’ny F3M. Fidinana an-dalambe eny amin’ny kianjan’ny 13 may no tanjona farany amin’izany hetsika izany. Tafahoatra ny fihetsika ataon’ny fitondrana Rajoelina, hoy ihany izy ireo, toa ny fandroahana mpiasam-panjakana, fanapahana karama raha tsy hiteny afatsy ny Paramed sy ny Sempama ary ny famindran-toerana tsy ara-dalana.

Nomarihan’izy ireo hatrany koa fa tsy filoham-pirenena araka ny nambaran’ny RNM sy ny TVM akory Andry Rajoelina; nangatahan’ny F3M fanazavana rahateo koa ny fiavian’ny volan’ny filohan’ny Tetezamita. Manam-pikasana hihaona amin’ny SADC moa ity Fiaraha-mientan’ny mpiasam-panjakana Malagasy ity, hitondran’izy ireo porofo amin’ny zava-misy eto amin’ny firenena. Hametraka taratasy ho an’ny praiminisitra Omer Beriziky kosa izy ireo androany amin’ny 9 ora eny Mahazoarivo.
Fifidianana
Tsy ny fampihodinana ny milina eo anivon’ny asam-panjakana ihany no hikatso rahatoa ka miroso amin’izay fikomiana tanteraka izay ny mpiasam-panjakana fa indrindra koa ny fifidianana amin’ny volana may 2013. Hentitra anefa ny F3M fa tsy hampihemotra azy ireo velively ny mety hisiana na tsia ny fifidianana vokatry ny fitokonana faobe heverin’ny mpiasam-panjakana hatao. Fanovàna hoy izy ireo no nifanarahana tamin’ny filohan’ny Tetezamita, tamin’ny fotoana mbola naha ben’ny tanàna azy fa tsy izao fampahoriana ny mpiasam-panjakana sy ny vahoaka Malagasy izao. Namafisin’ny F3M fa tsy mila ny filoha Andry Rajoelina hitondra ny firenena intsony izy ireo ary nanao fanamby ny amin’izany mihitsy. Fampiadiana ny samy mpiasam-panjakana amin’ny fanaovana mizana mitanila no nataon’izao fitondrana izao, hoy hatrany ireo nandray fitenenana tetsy amin’ny CLT Tsiadana.
Misintaka tsikelikely
Niala tsikelikely teo anilan-dRajoelina avokoa ireo hery velona sy mpanao politika niara-dia taminy ny taona 2009. Anisan’ny lehibe tamin’ireny ohatra ny ministry ny Raharaham-bahiny, Pierrot Rajaonarivelo, anisan’ny niady ny hisian’ny demôkrasia teto amin’ny firenena na dia mbola tsy nijoro aza ny antoko MDM tamin’ny fitondran-dRavalomanana Marc. Teo ihany koa ireo mpanao politika sy minisitra maro niaraka nanangana ny governemanta HAT teny amin’ny kianjan’ny 13 may. Ireo izay tsy niharitra ny loza sy ny fampahoriana nataon’ny fitondrana teo aloha azy ireo fony mbola teny an-kianja sisa no miara-dia amin’ny filoha Rajoelina, toa an-dry Annick Rajaona, Mamy Ravatomanga, Mamy Ratovomalala, Hajo Andrianainarivelo. Ireo voalaza anarana ireo rahateo koa no nangalany hevitra nialohan’ny nanaovany iny fanambarana omaly alina iny.