An-tapitrisa ireo tsy manana kara-panondro

16/01/2013

Tsy ho ela dia ho tafakatra iray tapitrisa ny isan’ireo mpifidy efa voasoratra anarana amin’ny lisim-pifidianana kanefa tsy manana karapanondrom-pirenena. Naneho ny ahiahiny manoloana izany zava-misy izany sy ny fiatrehana ny fifidianana eto Madagasikara ny Minisitry ny Ati-tany. Naneho ny tsy fahafaliany amin’ny fanaovana an-kilabao ny ministera izay tantanan’ny olona tsy misolelaka any amin-dRajoelina ihany koa ity mpikambana ao amin’ny governemanta ity. Nilaza ny hanome vola izay tsy ampy ny antsasaky ny ilaina amin’ny fanomezana karapanondrom-pirenena ireo mpifidy mbola tsy manana izany kosa ny ministeran’ny Fitantanam-bola. Mbola haroso ho dinihina ao amin’ny Filankevitry ny Governemanta anefa ny momba izany.

Iza no homena tsiny raha tsy hahazo kara-panondrom-pirenena ireo olom-pirenena tokony hahazo izany ary tokony handray anjara amin’ny fifidianana? Izay no fanamarrihana nataon’ny Minisitry ny Ati-tany, Florent Rakotoarisoa raha naneho ny ahiahiny manoloana ny habetsahan’ireo mpifidy voasoratra anarana kanefa tsy manana kara-panondrom-pirenena ny tenany, omaly. Raha araka ny fanazavana’ity tompon’andraikitra ity dia efa mahatratra 850 000 amin’izao fotoana izao ny isan’ny mpifidy voasoratra anarana kanefa tsy manana kara-panondrom-pirenena. Nambarany ihany miakatra isan’andro io isa io, arakaraky ny tatitra avoakan’ny CENIT, ary mety hahatratra iray tapitrisa izany afaka herinandro vitsivitsy. Mbola nanamafy izany ihany koa ny fanambaran’ny filohan’ny CENIT, Béatrice Atallah, izay nilaza fa mahatratra 933 000 amin’izao fotoana izao ny isan’ny mpifidy voasoratra anarana kanefa tsy manana karapanondrom-pirenena.
Tondroin’ny Ministry ny Atitany ho antony nahatonga izany fahamaroan’ny mpifidy tsy manana kara-panondrom-pirenena izany ny fampiatoana ny asa manandrify ny fanomezana kara-panondro izay nosahanin’ity departemanta ity sy ny fanajanonana ihany koa ny fanomezana kopia naterahana izay nosahanin’ny Ministeran’ny Fitsarana. Nambarany ihany koa fa naaton’ny governemanta ny famatsiam-bola nahafahana nanao izany. Fihetsika izay nokianiny mafy satria ny mifanohitra amin’izany no misy ho an’ireo Ministera izay tantanan’ny olona mahay misolelaka ny Filohan’ny Tetezamita. “Raha minisitra hafa akaiky ny fitondrana no tao amin’ny ministeran’ny Ati-tany dia efa nahazo famatsiam-bola hatry ny ela ny fanaovana kara-panondrom-pirenena”, hoy ny nambaran’ny Minisitry ny Atitany.
Marihina fa araka ny loharanom-baovao dia efa nilaza ny hanome vola ahafahana manatanteraka an’ity fanomezana kara-panondrom-pirenena an’ireo izay mbola tsy manana izany ny Ministeran’ny Fitantanam-bola. Vola mitentina 1 250 000 000 ariary no voalaza fa homena amin’izany. Nambaran’ny minisitry ny Atitany anefa fa tsy misy afa-tsy ny ampahefatry ny vola ilaina ity mety homen’ny Ministeran’ny Fitantanam-bola ity. Etsy an-danin’izany anefa, mbola nanambara ihany koa ny loharanom-baovao fa mbola entina ho dinihina eo amin’ny Filankevitry ny Governemanta ny hanomezana na tsia an’ity vola hikarakarana ny kara-panondrom-pirenena ity.
Iray amin’ireo tranga mety hampisy fanakianana goavana eo amin’ny fampizorana araka ny tokony ho izy ny raharaham-pifidianana arak’izany ity fisian’ny mpifidy an-tapitrisany tsy manana kara-panondrom-pirenena ity.