Notafihana tao an-tranony

17/01/2013

Lasibatry ny fanafihan-jiolahy , alina teo, ny trano fonenan’ny Filohan’ny Fiangonana FJKM, ny mpitandrina Rasendrahasina Lala. Tokony ho tamin’ny 12 ora sy sasany alina tany ho any no niditra an-keriny tao amin’ny tokotanin’ity fianankaviana ity ireo jiolahy miisa efatra nitondra basy PA miisa telo, araka ny fitantaran’i Pastora Rasendrahasina Lala ihany. Nodoran’ireo jiolahy tamin’ny alalan’ny fitaovana mitahiry herin’aratra aloha ny mpiambina tao ivelan’ny trano mialoha ny nanereny ity farany handondona ny varavarana ka nanery ny mpiambina tao anatin’ny trano sy namatotra azy niaraka tamin’ilay voalohany avy eo. Afa-niditra malalaka hatrany amin’ny trano fandrian’ny mpitandrina mivady avy eo ireto olon-dratsy ireto ary naharitra antsasakadiny be izao izy ireo no nanao ny asa-ratsiny.

Lasan’izy ireo nandritra izany ny volamena izay sendra azy ireo, ka isan’izany ny peratra teny amin’ny ratsantanan’i Pastora. Lasan’izy ireo ihany koa ny vola sy ny finday miisa sivy ary ny solosaina miisa efatra. Tsy nisaro-tava ireto mpangalatra ireto, araka ny fitantaran’ny mpitandrina Rasendrahasina, ary nilaza izy ireo fa nisy olona naniraka azy hanao izany asa ratsy izany.
Hatreto dia tsy mbola misy mangirana ny amin’ny mety hahafantarana raha halatra tsotra toy ny fandre matetika amin’izao fotoana izao ity nanjo ny filohan’ny FJKM ity na zavatra hafa. Mety ho fanariana dia ny fanadihadiana ihany koa ny filazana fa nisy naniraka ireo mpangalatra. Tsy azo tsinotsinoavina amin’ny fikarohana ihany koa anefa izany satria iaraha-mahalala ny toerana misy ity mpitandrina ity eo amin’ny fiainam-pirenena sy ny fiainam-piangonana eto Madagasikara.
Na izany na tsy izany dia efa nandray an-tànana ny fanadihadiana ny mpitandro filaminana avy ao amin’ny polisim-pirenena sy ny avy ao amin’ny zandarmariam-pirenena izay efa naniraka mpanao fanadihadiana teny an-toerana ny omaly maraina ihany. Efa tazana teny amin’ny trano fonenan’ny mpitandrina rasendrahasina ihany koa ireo lohandohany ao amin’ny fiangonana FJKM. Araka ny resaka re teny an-toerana nandritra ny fandalovan’izy ireo dia hisy ny fivorian’ireo mpitandrina rehetra ao amin’ny FJKM eto Antananarivo androany eny Ambatonakanga mba handinihana ny fepetra ho raisina manoloana ity herisetra nanjo ny mpitandrina Rasendrahasina ity.