Mahatratra 723 622 (43%) ireo niala-nianatra

17/01/2013

Ny atontan’isa tao amin’ny UNICEF no nahafantarana fa nahatratra 723 622 ny isan’ny mpianatra nitsiaka ny lakilasy teny amin’ny ambaratonga fototra nandritra ny taom-pianarana lasa. Mifanandrify amin’ny 43% n’ny mpianatra manerana ny Nosy tamin’io taom-pianarana io ny isa voarakitra tao amin’ny UNICEF. Mbola mety hiakatra io isa io raha ny zava-misy amin’izao fiandohan’ny taom-pianarana izao no jerena araka ny voalazan’ny to:mpon’andraikitra iray tao amin’ny UNICEF eto Madagasikara ihany. Tafakatra avo dia avo amin’izao fotoana izao ny tahan’ny fialana an-dakilasy ho an’ny fanabeazana fototra eto Madagasikara.

Araka ny atontan’isa voarakitra ao amin’ny UNICEF eto Madagasikara dia mahatratra 723 622, kizany hoe 43% n’ny isan’ny mpianatra tamin’izany taom-pianarana izany, no nitsoaka an-dakilasy tamin’ny taom-pianarana 2010-2011. Raha ho an’ny ankizivavy manokana dia mahatratra 42% izany fialana lakilasy izany. Mbola ambony noho io kosa ny fialana an-dakilasy rah any fidirana amin’ny ambaratonga faharoa no resahana. Mahatratra 65% ny tahan’ny fialana an-dakilasy amin’io dingana io. Marihina fa tamin’ny taona 2008 dia tsy nisy afa-tsy 25% izany fialana an-dakilasy izany manerana ny Nosy. Mbola ny atontan’isa tao amin’ny UNICEF ihany koa no nahitana fa tafakatra avo telo heny ny isan’ny mpianatra niala an-daharana nandritra ny 10 taona teto Madagasikara.
Maro ny voalaza fa antony mety nahatonga izany fialanaa an-dakilasy izany. Isan’ireny ny antony avy amin’ny fianankavian’ilay ankizy toy ny fahantrana sy ny tsy fananam-bola. Eo ihany koa anefa ny antony hafa toy ny tsy fananana kopia naterahana. Mbola isan’ny antony mahatonga ny fialàna an-dakilasy ihany koa ny lafiny ara-piaraha-monina toy ny tsy fandriam-pahalemana sy ny tsy falavorarian’ny sekoly ary ny tsy fisihan’ny mpampianatra. Voalaza ihany koa fa isan’ny mahamaro ny mpianatra miala an-daharana ihany koa ny fisian’ireny fampidiram-bola haingana toy ireny fitrandrahana harena an-kibon’ny tany ireny
Ankoatr’ireo voalaza ireo dia manana ny andraikiny amin’izay fialàn’ny mpianatra amin’ny fianarany izay ihany koa ny fitondram-panjakana, raha tsy hilaza afa-tsy ny fiovaovan’ny politikan’ny fanabeazana sy ny fifanarahan’ny tetiandrom-pampianarana amin’ny tetiandrom-pambolena isika. Eo ihany koa, etsy an-danin’izany ny fitontongan’ny lanjan’ny mpampianatra sy ny fampianarana eny amin’ireo sekoly tantanan’ny fanjakana.
Tandindonin-doza arak’izany ny tontolon’ny fanabeazana eto amintsika. Mety hisy fiantraikany amin’ny fianam-piaraha-monina ihany koa izay fialàna an-tsekoly izay satria ahina mafy ny mety ho fiakatry ny tahan’ny tsy fananana asa sy ny fitomboan’isan’ny mpirenireny.