Hamantsika fiangonana ny FLM Antananarivo

22/10/2012

Lavin’ireo Pastora ato anatin’ny sinaodam-paritany Antananarivo eo an’ivon’ny Fiangonana Loterana Malagasy ny famindra-toerana ireo Pastora izay nataon’ny komity foiben’ity fiangonana ity. Nambaran’izy ireo nandritra ny valan-dresaka ho an’ny mpanao gazety izay nataony ny faran’ny herinandro teo fa tsy manaja ny lalana mifehy ny Fiangonana izany famindran-toerana izany ary tsy nisy fiaraha-midinika tamin’ireo izay voakasik’izany. Nanambara ary ireo Pastora ato anatin’ny sinaodam-paritany Antananarivo fa tsy hanaiky ny famindran-toerana izy ireo ary tsy hanome toerana ireo izay

notendrena amin’ny toerana misy azy ireo . Mety hiafara amin’ny famantsiana ny trano fiangonana ny raharaha, hoy izy ireo.Tsy voafehin’izy samy izy intsony ny disadisa misy eo an’ivon’ny Fiangonana Loterana eto Madagasikara. Nivoaka ivelan’ny Fiangonana izany hatramin’ny nisian’ilay fanambarana nataon’ireo Pastora tao amin’ity Fiangonana ity, tamin’ny faran’ny herinandro teo, izay naneho ampahibemaso ny tsy fankatoavan’izy ireo ny famindran-toerana ireo Pastora roapolo mahery nataon’ny komity foiben’ny FLM. Nambaran’ireto Pastora tsy manaiky ny famindran-toerana azy ireo fa tsy manaja ny lalàna misy eo an’ivon’izany Fiangonana sy ny fomba famindran-toerana ny Pastora izao fanampahan-kevitry ny komity foiben’ny FLM izao. Mbola ireto mpitandrina avy ao amin’ny sinaodam-paritanin’Antananarivo ao amin’ny Fiangonana Loterana Malagasy ireto ihany koa no nanamarika fa fanampahan-kevitra mandeha ila, izany hoe tsy nisy fiaraha-midinika tamin’ireo izay voakasik’izany, izao famindran-toerana izao ka tsy eken’izy ireo. Eo anatrehan’izany dia nanambara ireto Pastora ireto fa tsy manaiky marindrano izany famindran-toerana izany izy ireo. Nanambara ihany koa izy ireo fa sady tsy hiala amin’ny fitandremana misy azy ireo no tsy hanome izany fitandremana izany ho an’izay mpitandrina vaovao alefan’ny komity foiben’ny FLM. Mety hiafara amin’ny famantsiana ny fiangonana izao raharaha izao, hoy ny hafatr’izy ireo nandritra ny valan-dresaka ho an’ny mpanao gazety izay notanterahany ny faran’ny herinandro teo.
Firehana samy manana ny azy ?
Tsy sambany no nandrenesana ity olana misy eo an’ivon’ny Fiangonana Loterana Malagasy momba ny fandavana ny famindran-toerana ataon’ny Komity Foibe ity. Izany hoe efa herinandro maromaro no efa nadrenesana izany raharaha izany. Saingy matoa tsy nahitam-bahaolana izany mandrak’izao dia satria samy miziriziry amin’ny heviny ny an-daniny sy ny an-kilany. Fiziriziriana izay mampametram-panontaniana ny mpanara-baovao tokoa satria matoa miziriziry amin’ny heviny dia satria samy manana ny tombon-tsoa arovany ny isan’isany avy. Tombon-tsoa izay heverin’ny maro fa tsy mifanalavitra amin’ny zava-mitranga tsy ahitam-bahaolana eto Madagasikara sy ny mety ho disadisa ihany koa taorian’ireny fifidianana izay ho filohan’ny FLM ireny. Fifidianana izany nisehoan’ny tsy fitovian-kevitra mifandraika amin’ny zava-misy eto amin’ny firenena.
Na izany na tsy izany, azo heverina fa mety hanamafy ny tsy fitovian-kevitra efa misy eto amin’ny firenena ao anatin’izao krizy izao ity toe-draharaha ifanolanan’ny pastora ato anatin’ny sinaodam-paritany Antananarivo sy ny Komity Foibe izao. Disadisa izay mampatsiahy ny zava-nitranga tao an’ivon’ny Fiangonana FJKM izay nampivaky roa azy ka nampisintaka ny FPVM tamin’ny fotoan’androny. Ity farany izay tsikaritra fa nanana firehana tany amin’ny mpitondra amin’izao fotoana izao rehefa nirona tany amin’ny mpitondra teo aloha ireo tao amin’ny komity foiben’ny FJKM.