Nisy namaky ny biraon’ny CENIT

18/01/2013

Iza no manana tombontsoa amin’ny tsy fahatontosan’ny lisim-pifidianana ka namaky ny biraon’ny CENIT tany Mahanoro? Izay no fanontaniana teo am-bavan’ny maro raha nahare fa nitrangana vaky trano tao amin’izany biraon’ny CENIT any Mahanoro izany ny alin’ny alahady 13 janoary. Ny efitra nisy ireo lisim-pifidianana mihintsy no lasimabtry ny asa-ratsin’ireo mpangalatra. Very tamin’izany ireo solosaina roa izay vao azo tamin’ny CENI-T foibe. Mampametram-panontaniana ny maro ny tena anton’izany halatra izany. Raha araka ny fanazavan’i Marcellin Maso Sekretera jeneralin’ny CENI-T ao amin’ny Faritra Atsinanana dia halatra tsotra vokatry ny fahitana ireo solosaina tao amin’ity efitrano ity izao nitranga izao satria tsy nalain’izy ireo ny “serveur” fitehirizana ny lisim-pifidianana.

Ny loharanom-baovao hafa avy ao amin’ny mpitandro filaminana nandray an-tanana an’ity raharaha ity kosa no nahalalana fa tsy halatra tsotra no nisy fa mety nisy nanarika ireo jiolahy ireo, saingy noho ny tsy fahalalany ny resaka solosaina sy informatika dia izay hitany ihany no nalainy.
Efa mandeha ny fanadiadiana ny raharaha amin’izao, izay iarahan’ny zandary sy ny polisy any an-toerana ary ny lehiben’ny distrikan’i Mahanoro.

Marihina fa araka ny fampitam-baovaon’ny CENI-T Atsinanana, dia efa eo am-pamaranana ny fandrafetana ny lisim-pifidianana izy ireo amin’izao fotoana izao. Efa ny 97% n’ny lisitra no vita. Efa handefa ny lisitra ho eny anivon’ny CENI-T foibe ihany koa izy ireo aorian’ny fepotoana ahafahan’ny mpifidy mijery sy manamarinana ny anarany, ny laharan’ny karatra, sy ny mombamomba azy, mba hanatsarana sy hanamarinana ny lisim-pifidianana araka ny fanambin’ny CENI-T.
Raha ny zava-nisy tamin’ny lisim-pifidianana farany, araka ny fanavaozana nataon’ny CENI teo aloha ho an’ny Faritra Atsinanana dia nahatratra 40% ny “doublons”, ho an’ny distrikan’i Toamasina I, 45% ny tao amin’ny distrikan’i Toamasina II ary ny tao Mahanoro dia efa nihoatra ny 50%. Ankoatr’izay, dia manana olana amin’ny fandoavana ny karaman’ireo “operateurs de saisies” ny CENI-T foibe. Mitaraina noho izany ireo distrika fito ao amin’ny Faritra Atsinanana. Voalaza fa tao amin’ny distrikan’i Toamasina II, raha 80 ariary isan’olona no nifanarahana dia lasa 80 ariary isaky ny taratasy misy ny anaran’ny mpifidy indray izany amin’izao fotoana izao.