Olona enina no novonoin’ny fokonolona

18/01/2013

Tsy latsaky ny 700 ny isan’ireo nifarimbona namono ireo olona enina tamin’ireo fito voaroiroy nangalatr’omby tany amin’ny kaomina ambanivohitra Ambohisoa any amin’ny distrikan’i Mandritsara. Tao amin’ny Poste avancé, an’ny Zandarmariam-pirenena tao Ambohisoa ihany no nitrangan’izany. Nanao tifi-danitra nandroahana ireo fokonolona ny mpitandro filaminana saingy tsy nasaka ireo vahoaka izany. Nahitana vono olona noho ny raharaha halatr’omby indray tany amin’ny kaomina ambanivohitr’i Ambohisoa distrikan’i Mandritsara.

Olona miisa 6 no novonoin’ny fokonolona noho izay raharaha halatr’omby izao. Araka ny tatitra nataon’ny zandarmariam-pirenena dia nanomboka tamin’ny 6 janoary izay nisian’ny halatr’omby tao amin’ny fokontany Babana tao amin’ny kaomina Ambohisoa ity raharaha ity. Ny alin’io 6 janoary io no nisy nangalatra ny ombin’i Mainty tao amin’ity tanana ity. Nahazo fampandrenesana manandrify izany ny zandary tao amin’ny Poste avancé tao Ambohisoa sy ny Borigadin’ny Zandarin’i Mandritsara. Tamin’ny 8 janoary kosa no nisamboran’ny zandary tao Mandritsara an’ireo olona miisa 7 izay nahiana ho nagalatra an’ireo omby ireo. Nanomboka teo ny fanadihadiana nataon’ny zandary an’ireo olona ireo ka tsy nifarana raha tsy tamin’ny 15 janoary.
Tamin’io andron’ny 15 janoary io anefa dia tonga tao amin’ny Poste avancé tao Ambohisoa ny fokonolona izay notarihana sefo fokontany avy any Apombolava sy avy any Ambahy ary avy ao Ambohisoa sy Belinta. Nahatratra 700 mahery ny isan’ny vahoaka tonga teo tamin’izany fotoana izany. Nangataka ny hanomezana azy an’ireo olona natao famotorana tao amin’ny zandary ireo fokonolona ireo saingy tsy nanaiky izany ny mpitandro filaminana. Nanao an-keriny anefa ny fokonolona, na dia nanao tifi-danitra aza ny zandary. Vokany, azon’ireo fokonolona ihany ireo olona enina tamin’ireo olona fito voatazona tao amin’ny zandary. Maty tsy tra-drano noho ny vono nahazo azy arak’izany ireto olona ireto. Afa-nandositra ary mbola tsy hita hatramin’izao kosa ny olona iray tamin’izy ireo.
Marihina fa efa mandray an-tanana an’ity raharaha ity amin’izao fotoana izao ny zandary any amin’ny Kompanian’i Mandritsara, indrindra ny fikarohana ilay olona voaroiroy ka tafatsoaka nandritra ny fahatongavan’ny fokonolona.