Namono olona ny fiaran’ny kaomina

18/01/2013

Miomana fatratra amin’ny fahatongavan’ny filohan’ny tetezamita Andry Rajoelina ny ao Toamasina ao. Misy arak’izany ny fanadiovana ny tanana amin’ny alalan’ny fandraofana ireo fako miavovona etsy sy eroa. Nitera-doza anefa izany fandraofana fako izany. Maty tsy tra-drano vokatry ny fanitsahan’ilay fiara mpanary fako ny mpitondra cyclo-pousse iray. Maty tsy tra-drano ilay mpitondra cyclo-pousse izay voahitsky ny fiarabe mpanary fakon’ny kaominina Toamasina. Omaly tokony tamin’ny sivy ora sy sasany no nitrangan’izany, raha tonga naka ireo fakobe miavosa tao amin’ny Bazary kely izany fiara izany.

Toerana be posy sy cyclo-posy ary be olona ity faritra nitrangan’ny loza ity. Araka ny fanazavana azo tamin’ny polisy misahana ny loza an-dalam-be izay nanao ny fanadiadiana, dia nirahan’ilay tena mpamily nanetsika ilay fiara be ny mpibata ny fako iray antsoina hoe Lahady Raymond 27 taona. Tsy nahafantatra kosa ity farany fa efa misy vitesy mihemotra ilay fiarabe. Vokany, raha vao velona ilay fiara dia nihemotra ary nanitsaka posy 07 sy scooter iray. Nandritra izay no nandalo ny cyclo-posy iray izay nitondra olona ka voafaoka. Afaka niala ihany ilay mpitaingina saingy ilay “jockers” no tsy afaka ka notetezin’ilay fiarabe mpanary fako laharana 52054WWT nanomboka teo amin’ny kibony hatrany amin’ny tongony ilany havia. Nentina avy hatrany teny amin’ny hopitaly be ilay raim-pianakaviana antsoina hoe Ramanandraitsivory David Jasmin 35 taona. Na nanao izay ho afany aza ny dokotera tao amin’ny hopitaly be dia tsy tana ny ainy ny tolakandron’ny omaly.
Notanana ao amin’ny polisy ilay mpamily sy ilay fiaraben’ny kaominina na efa maro aza ny “intervention” amin’ny hakana ilay fiarabe namono olona. “Izahay foana no omena tsiny fa maro ka manelingelina ny fifampoivoizana, nefa izao fiara be tsy misy ‘frein’ no ampiasain’ny kaominina ka namon’olona izao. Aminay tsy hitanay mihintsy no hanaovan’ny kaominina fanalana ny fako andro atoandro be ity, any amin’ny kaominina hafa dia alina hatrany no fanaovana izany”, hoy ireo mpitarika posy namany. Ny teo anivon’ny kaominina moa tsy nahazoana vaovao, fa samy mbola sahirana amin’ny fitokanana ny “zava-bita” ny sabotsy izao, sy nikaraka ity mpitondra posy nitsahan’ny fiarabeny mpaka fako atoandro ao Barary kely.