Tsy nety natao fitaovana intsony ny mpandraharaha

19/01/2013

Efa sahy mitodi-damosina ny filohan’ny tetezamita amin’izay ny rehatra amin’izao fotoana izao, indrindra hatramin’ny nahafantarana fa tsy haharitra ela eo amin’ny fitondrana intsony ny tenany. Isan’izany ireo mpandraharana any Toamasina izay tsy nanaiky intsony ny hanome fanampiana ho fiatrehana ny fety hitokanana ny hôpitaly manara-penitra. Velon-taraina noho izany ny komity mpanomana ny hetsika satria nanakatom-baravarana azy ireo ny an-kamaroan’ny mpandraharaha tany an-toerana. Vola mitentina 60 tapitrisa ariary no noheverina ho voaangona avy amin’ireo

mpandraharaha ao an-tampon-tananan’i Toamasina ho fiatrehana ny fitokanana ireo zava-bitan’ny fitondrana Tetezamita any an-toerana amin’ity androany ity. Tsy nisy afa-tsy 50 000 ariary anefa ny vola voaangon’ny komity mpanomana, araka ny tatitra nataon’izy ireo ny alarobia lasa teo. Marihina fa efa ho roa herinandro no nananganana izany komity manokana natao hanomana ny fitokanan’ny filohan’ny tetezamita, ireo zava-bita “manaram-penitra” tao Toamasina izany.
Mbola ny tatitra nataon’ity komity ity ihany koa no nahafantarana fa nanakatom-baravarana tsy nety nanome vola azy ireo avokoa ny an-kamaroan’ny mpandraharaha nantonin’izy ireo. Ny fanazavana azo tamin’ireo mpandraharaha izay nanontaniana kosa no nahitana fa ny tsy firaharahiana azy ireo amin’ny fahasahiranana mianjady aminy sy ny tsy fankasitrahany ny fanaovana azy ho toy ny tohatra fiakaran’ny mpanao politika no antony nahatonga azy ireo hiray hevitra tsy hanome fanampiana ny fikarakarana ny fety fitokanana ny zava-bitan-dRajoelina any an-toerana. “Atao fakana vola anaovana fety fotsiny izahay isaky ny misy hetsika tian’ny fanjakana atao; kanefa ny momba anay amin’ny fahasahirananay tsy andeferan’izy ireo sy tsy misy mpijery mihintsy”, hoy ny mpandraharaha iray izay tsy nitonona anarana. “Porofon’ny tsy firaharahian’ny fanjakana anay ny fahitana fa raha misy asa atao eto amin’ny tanana dia tsy mba isany mahazo amin’izany asa izany izahay fa ireo mpandraharaha avy amin’ny faritra hafa sy ireo orinasan’ny mpitondra na ny mpiray petsapetsa amin’ny fitondrana ihany no mahazo izany”, hoy kosa ny mpandraharaha iray hafa.

Ankoatr’izay fandàvan’ny mpandraharaha ny fanampiana ny komity mpanomana ny fitokanana ny hôpitaly manara-penitra izay, dia isan’ny vaovao nanaitra ny maro tao Toamasina ihany koa ny momba ireo entana sy fitaovana napetraka tao amin’ny hôpitaly manara-penitra izay notokanana androany. Omaly hariva vao tonga ireo fitaovana nafarana avy any “Chine” hapetraka aoamin’izay hôpitaly manaram-penitra izany. Tsy vitan’izany fa namoahana “franchise totale” haingana dia haingana ireo entana ireo, omaly mba hanenjehana ny fitokanana androany. Maro dia maro arak’izany ny fanelanelanana sy ny fanerena ireo tompon’andrikitra isan-tokony avy tao amin’ny fadin-tseranana mba hamoahana izany haingana dia haingana.