Mitonona havan’ny praiminisitra

21/01/2013

Avo lenta tokoa ny fomba fanaon’ireo olon-dratsy ary dia toa ireny tambazotra Mafia any an-dafy ireny mihitsy. Voafitaka avokoa manomboka any amin’ny Fitsarana, ny mpitandro filaminana ary ireo tomponandraikitra ambony sy mpanao politika. Fakàna vola an-keriny (extorsion de fonds) mitentina 150.000.000 fmg no fototry ny raharaha. Nisy mpandraharaha mbola tanora iray nandeha nividy entana sy fitaovana tany Sina ny volana jolay 2012. Nalefany tamin’ny kaompania mpitatitra entana S.C ireo zavatra novidiany tany ireo. Naloany tamin’ny alalan’ny taratasim-bola (chèque) ny saran’izany. Tonga ihany anefa ny volana desambra 2012, ampahan’ireo entana fotsiny ihany no tonga teto Madagasikara. Teo no niandohan’ny fidiran’ireo tambazotra Mafia tao anatin’ny tantara. Nisy olona antsoina hoe R.E nitonona ho havan’ny praiminisitra Omer Jean Beriziky ary M.C nitonona ho mpitandro filaminana tonga tany am-piasanan’ilay mpandraharaha.

Marihana fa tale jeneraly lefitr’io orinasa io ity mpandraharaha mbola tanora ity. Nilaza taminy fa afaka hanampy azy amin’ny fandresen-dahatra ny S.C hamerina ny volany izy mianadahy ireto. Resy lahatra ilay mpandraharaha rehefa nandre fa zanaky ny praiminisitra ilay vehivavy. Nifaneken’izy ireo am-bava tamin’izany fa homena azy mianadahy ny 10%-n’ny vola tafaverina.
Ny olona tao amin’ny orinasa ihany anefa no nanao ny fifampiraharahana rehetra tamin’ilay kaompania mpitatitra entana; tsy nanao afatsy ny nanaraka ilay olona niandraikitra izany fotsiny i M.C nitonona ho pôlisy. Ny faha-15 janoary 2013 teo àry dia nanaiky hamerina 50.000.000 Ar ilay kaompania. Na tsy nisy asa nataon’ireto mitonona ho zanaky ny praiminisitra sy pôlisy ireto aza anefa dia neken’ilay tale jeneraly lefitra ihany ny nanome azy ireo ny 10%, izany hoe 5.000.000 Ar, araka ny fifanarahana am-bava tany am-boalohany. Teo amin’ny tokontanin’ny banky BVF Ankorondrano no nanomezana izany ary tao anaty fiaran’ny orinasa Ford Ranger.
Akory anefa ny hatairan’ny rehetra ny marainan’ny zoma 18 janaory 2013 lasa teo. Nigadona tao am-piasanan’ny ilay tale jeneraly lefitra ny fiara Nissan double cabine an’ny Emmo.Reg, miaraka amina zandary tsy latsaky ny fito nirongo basy nisambotra azy teo imason’ny mpiasa. Avy hatrany dia nentina teny amin’ny borigadin’ny zandarimaria etsy Betongolo ny tenany ary ilay mpiara-miasa aminy naka nanome ilay 10% ho an’i M.C. Didy fisamborana navoakan’ny Fampanoavana no niandry azy ireo teny amin’ny zandarimaria. Nitory azy ireo teny amin’ny Fampanoavana i M.C ilay mitonona ho pôlisy niaraka tamin’i R.E mitonona ho zanaky ny praiminisitra Omer Beriziky. Nihindrana vola 150.000.000 fmg tamin’i M.C hono ity tale jeneraly lefitra ity handoavana ny karaman’ny mpiasa.
Fakàna vola an-keriny
Niantso avy hatrany manamboninahitra eo anivon’ny fiadidiana ny praiminisitra ny havan’ilay tale jeneraly lefitra, nanontany raha tena zanaky ny praiminisitra marina ity vehivavy antsoina hoe R.E ity. Mazava sady hentitra ny valinteny fa tsy misy an’izany; teo koa vao nanomboka fantatra fa toa tsy pôlisy akory i M.C. Feno fahasahiana tokoa ireto tambazotra Mafia ireto satria dia efa niandry tao amin’ny zandariimaria nandeha fiarakodia Audi 80 miloko fotsy n°….izy ireo. Nihevitra tokoa angamba ireto olona ireto fa hatahotra ilay fisamborana goavana dia goavana ilay mpandraharaha ka dia hanaiky hanome izay vola tian’izy ireo. Etsy an-danin’izany ilay hoe didy navoakan’ny Fampanoavana (Soit transmis). Tsy nanaiky izany anefa ilay mpandraharaha satria ananany avokoa ny porofo rehetra sy ny vavolombelona tamin’ny fandoavana ilay 10% ary tsy nihindrana vola 150.000.0000 fmg tamin’i M.C izany velively ny tenany. Nametraka fitoriana avy hatrany teny anivon’ny borigadin’ny zandarimaria Betongolo koa ilay mpandraharaha noho izao fakàna vola an-keriny miampy fanalàm-baraka izao.
Lasa nandeha izy ireo raha vao nandre fa tsy natahotra ny fampihorohoroana natao azy ilay mpandraharaha ary tsy hanaiky handoa ny vola 125.000.000 fmg notakiana an-keriny tamin’ny fomba avo lenta. Nisy nahita tao amina mpanao politika malaza iray eny Andoharanofotsy teny izy ireo ny sabotsy 19 janoary 2013, andro nakana am-bavany ilay mpandraharaha araka ny fitoriana napetrany (déposition). Eo am-piandrasana ny fakàna am-bavany ireto tambazotra ireto araka izany ny mpanara-baovao.
Raha fehezina dia ny resaka dia tena hain’ity tambazotra ity mihitsy ny namitaka ny Fampanoavana ka nahatonga ny famoahana ilay didy fisamborana. Mampametra-panontaniana ihany anefa ny maha ady heloka ilay raharaha raha tena hoe nihindrana izany vola 150.000.000 fmg izany tamin’i M.C ilay mpandraharaha. Voafitaka toraka izany koa ny mpitandro filaminana raha tsy izany ho zandary tsy latsaky ny fito mirongo basy ary nampiasana ny fiarakodian’ny Nissan an’ny Emmo.reg tahaka ireny hisambotra jiolahy mpanao fanafihana mitam-piadana ireny mihitsy. Eo am-pelatanan’ny borigadin’ny zandarimaria Betongolo ny raharaha amin’izao fotoana.