Mpiandry faty notifirin’ny dahalo

21/01/2013

Miha-mahazo vahana indray amin’izao fotoana izao ny halatr’omby sy ny fampihorohoroana ataon’ny dahalo. Tranga iray no nisy tany Vohimarina any amin’ny Distrikan’Ambalavao. Namphorohoroan’ny jiolahy tamin’ny alalan’ny poa-basy aloha ireo mpiandry faty tao an-tanana vao norarafany tamin’ny fititra variraraka ka nisy ny naratra vokatr’izany. Ny ampitson’iny kosa dia ny omby tao an-tanana no lasan’izy ireo. Tsy hita taratra kosa, hatreto ny fandraisan’andraikitry ny mpitandro filaminana teo anatrehan’izany rehetra izany.

Raha tsy re laza intsony amin’izao fotoana izao izay niafaran’ilay hetsika manokana “Tandroka” izay nokasaina hamongorana ny dahalo tany amin’ny faritra atsimo, tamin’ny alalan’ny fisamborana an-dRemenabila, dia mbola mandry tsy lavo loha hatrany nohon’ny afitsoky ny dahalo ny mpinina amin’ny tanana maro any amin’zany faritra izany hatramin’izao. Manaporofo izany ny nitranga tao Vohimarina any amin’ny distrikan’Ambalavao, tamin’ny alakamisy lasa teo. Nisy fianankaviana zandary avy aty Antananarivo izay nitondra razana halevina tany amin’izany tanana izany. Teo am-piandrasam-paty iny indrindra ny vahoaka miaraka amin’ireo vahiny avy aty Antananarivo no injay fa nanao tifi-danitra nampihorohoro ny manodidina ireo dahalo. Nandray andraikitra avy hatrany anefa ny fokonolona tao an-tanana tamin’ny alalan’ny fiambenana ny valan’omby sy ny kizo rehetra ka dia tsy afa-nanao n’inon’inona ireo dahalo. Hany sisa nataon’izy ireo dia ny fitifirana ireo mpiandry faty izay naharatrana roa, ka ny iray voa teo amin’ny ranjony ary ny iray teo amin’ny feny. Tsy nisy aina nafoy kosa nandritra izany tifitra nataon’ny dahalo izany.
Niantso avy hatrany ny zandary tao amin’ny borigady any Ambalavao ny mponina tao Vohimarina tamin’io alina io ihany, nilaza ny zava-nisy. Nampanantena ny ho tonga avy hatrany ireo zandary kinanjo tsy nisy n’iza n’iza tonga tamin’io alina io. Ny ampitso maraina izy ireo vao nandefa zandary nanao fanadihadiana teny amin’ny manodidina ary niverina avy hatrany tany Ambalavao. Nambaran’ireo zandary ireo fa noho ny tsy fisian’ny fiara dia tsy afaka tonga avy hatrany izy ireo tamin’ny fotoana nazoana ny antso.
Tsy nijanona tamin’izay fampihorohoroana izany anefa ny dahalo satria ny zoma, rehefa avy andevina ny fokonolona, dia fantatra fa nanafika indray izy ireo. Lasan’izy ireo tamin’izany ny omby am-polony tao amin’izany tanana voatafika izany. Hatreto anefa dia mbola tsy hita hatrany izay fandraisan’andraikitry ny mpitandro filaminana, toy ny fanarahan-dia izay tokony hatao amin’ny toer-draharaha tahaka itony. Mandry tsy lavo loha arak’izany ny mponina any amin’iny faritra iny.