Izay vao nanomboka ny asa fanarenana

21/01/2013

Ny asabotsy teo vao nanomboka niasa ny orin’asa nahazo ny fanarenana ny lalam-pirenena faha 5 mampitohy an’i Toamasina amin’ny Mahavelona Foulpointe, raha efa vita ny ao Foulpointe makany Fenerivo atsinanana. Raha araka ny nambaran’ny Filohan’ny tetezamita izay nanokatra ny fanamboarana izany lalana izany tamin’ny 25 oktobra 2012 dia ny faran’ny volana janoary izao no tokony ho vita ity lalana ity. Raha ny zava-misy, dia noterana ny MainLand hiantoka ny vola Araka ny nambaran’ny minisitry asa vaventy, ny Jeneraky Botomanovatsara, dia olana teo amin’ny ministera sy ny orin’asa MainLand Mining ary ny orinasa tokony hanao ny asa dia ny Smapt no antony tsy nahavitany tao anatin’ny fotoana nifanarahana tamin’ny fanjakana ny fanarenana izany lalana izany.

Ny MainLand ihany no hanao ny asa araka ny ny fifanarahana vaovao. Ny minisitera kosa no mpanara-maso ara-teknika; ka fanampenana ireo lavaka sy fanamboarana ny ampahany tena simba be no tena hatao.
Tamin’ity fotoana ity ihany koa no nanambaran’ny Minisitry ny Asa vaventy hatrany fa eo andalam-panovana ny lalàna laharana faha 98.026 ny minisitera amin’izao fotoana izao ka ny tanjona dia mba ahatonga ireo orin’asa mpitrandraka harena an-kibon’ny tany ho isany fidiram-bola amin’ny fanarenana ny lalana eto Madagasikara noho izy ireo isan’ny mpampiasa be ny lalana eto amintsika. Nomarihany ihany koa fa tsy ampy ampiasaina intsony ny ampaham-bola tokony alohan’ny mpandraharaha ara-tsolika, 07 – 10% avy amin’ny vidin’ny solika tokony hampiasain’ny FER.
Ankoatr’izay, fantatra fa hanitatra ny asa fitrandrahana fasimainty any amin’ny ilany atsimon’i Toamasina ny orin’asa MainLand. Miainga ao Soanierana Ivongo izany ary hipaka hatrany Mananjary. Eo am-pandinihana ny fitaovam-pitanterana amin’izany ny MainLand, ka raha ny vinavina dia ny lakan-dranon’ny Pangalanes no ampiasainy amin’izany. Tsara marihana fa ny 2007 no tonga voalohany tao Toamasina ny MainLand Mining, ny taona 2011 naaton’ny fanjakana tetezamita ny fitrandrahany.