Nopotehan’ny fitondrana tsy refesi-mandidy

22/01/2013

Nokianin’ny Tale jeneralin’ny Tahirimbolam-panjakana nandritra ny tafa nifanaovany tamin’ny mpanao gazety , omaly, ny fisian’ny tsy fanarahan-dàlana eny anivon’ireo orin’asam-panjakana sasantsasany toa ny Fanalamanga sy ny Kraoma. Tsy handray andraikitra amin’ny fanarenana ireny orinasa ireny ny Tahirimbolam-panjakana raha tsy mandray fepetra hiverina amin’ny fanarahan-dàlana izy ireny, araka ny fanazavan’ny Tale jeneralin’ny. Isan’izany fepetra izany ny fialàn’ny politika amin’ny resaka fitantanana ka hametrahana ny teknisianina amin’izany toerana izany. Ny politika tsy refesi-mandidy izay tondroiny ho iray amin’ireo namono ny orin’asam-panjakana sasany.

Mitaky ny tokony hanajana ny didy aman-dàlana mifehy ny orin’asa ananan’ny fanjakana petra-bola ny Tale jeneralin’ny Tahirimbolam-panjakana, Robimanana Orlando. Nisongadina izany nandritra ny famaliany ny fanontaniana napetraky ny mpanao gazety nandritra ny fitokanana ny Tahirimbola manokana misahana ny Fahasalamam-bahoaka izay notontosaina omaly. Ny raharaha mikasika ny orinasa Fanalamanga no nahatonga an’ity tomponandrikitra voalohany amin’ny Tahirimbolam-panjakana ity hitaky ny fampiharana izany fepetra izany. Raha araka ny fanambarana izay nataony teo imason’ny mpanao gazety dia voahitsakitsaka tanteraka ny zon’ny tompon’ny petra-bola ao amin’ity orin’asa ity, ka isan’izany ny fanjakana. “Hatramin’izao dia tsy mahafantatra ny momba ny fitantanana ao amin’ity orin’asa ity ny tompom-bola, tsy fantatra ny teti-bola iasany, tsy fantatra ny vola miditra sy lmivoaka ao, ary tsy fantatra ny alehan’izany vola izany”, hoy ny fanazavan’ny Tale jeneralin’ny Tahirimbolam-panjakana. . Efa nojerena ireo Banky rehetra eto amintsika, hoy ihany ny fanazavany, fa samy tsy nahitana ny kaontin’ity orinasa ity avokoa. Etsy an-danin’izany, nambarany ihany koa fa efa nandefa mpanao fanadihadiana (audit) tany amin’ny orinasa Fanalamanga ny Tahirimbolam-panjakana kanefa dia nolavin’izy ireo izany. Eo anatrehan’izany rehetra izany dia nilaza ny Tale jeneralin’ny Tahirimbolam-panjakana fa tsy afaka ny hiroso amin’ny fifampidinihina amin’ity orin’asa ity izy ireo mba ho fanampiana azy amin’ny famafana ny trosa misavovona izay misy ao aminy raha tsy miroso amin’izany fanajana ny làlana izay izy ireo.
Esory ny mpanao politika
Marihina fa isan’ireo efa niteraka resabe teto amin’ny firenena ny orin’asa Fanalamanga, noho izy voatondro ho isan’ireo orin’asa ataon’ny mpanao politika ho toy ny tantely afa-drakotra satria ataon’izy ireo fitaovana fitatiavam-bola. Ekena fa tsy nahitana taratra na kely aza mikasika ny fisian’izay fanararaotan’ny mpanao politika izay ny fanambaran’ny Lehiben’ny Tahirimbolam-panjakana, omaly. Saingy ny fitakiana ny fanesorana ireo mpanao politika amin’ny fitantanana ny orin’asa ananan’ny Fanjakana petra-bola dia midika avy hatrany fa mitaky ny fialàn’ny fangejan’ny politika ny raharaham-pitantanana ny volam-panjakana ny tenany. Midika ihany koa izany fa rangory fototry ny afo amin’ny fitotongan’ireny orin’asam-panjakana ireny ny tsy refesi-mandidy ataon’ireo mpanao politika. Nomarihany rahateo fa “isan’ny nahafaty ny ankabeazan’ireny orin’asa nananan’ny Fanjakana petra-bola ireny ny fifangaroan’ny fanjakana tsy refesi-mandidy sy ny fanjakana mpandraharaha manana petra-bola ao amin’ilay orin’asa”.
Tsara ny mampatsiahy fa taorian’ny fitsidihana nataon’ny Praiminisitra Omer Beriziky tany amin’ny orinasa Fanalamanga no nanaovan’ny Lehiben’ny Governemanta antso mba hisian’ny fifampidinihina eo amin’ny Tahirim-bolam-panjakana sy ity orin’asa ity mba hikarohana vahaolana momba ny trosan’izany orin’asa izany. Nilaza ny fahavononan’izy ireo handray anjara amin’izany fifampidinihina izany ny Tale jeneralin’ny Tahirimbolam-panjakana rehefa voaaraka avokoa ireo fepetra nambara tetsy aloha ireo.