Nidina an-dalambè ny mpanjifa

22/01/2013

Tsy takona hafenina intsony ny fahatezeran’ny mpanjifa noho ny afitsoky ny JIRAMA amin’ny fatapatapahan’ny famatsiana herin’aratra any amin’ny faritra samihafa manerana ny Nosy. Nirotsaka an-dalambè naneho ny tsy fahafaliany ny mpanjifa tany Ankazobe. Naneho ny tsy fahafaliany ihany koa ny mpanjifa tany Antalaha. Ahiana arak’izany ny hisian’ny hetsika mafimafy kokoa raha tsy misy fandraisan’andraikitra manoloana izany rehetra izany. Tsy mahita vahaolana maharitra ialana amin’ny fatapatapahan-jiro hatreto ny fitondram-panjakana. Tsy ho ela, arak’izany, dia ho lasa olana ara-piaraha-monina eto Madagasikara ny fatapatapahan’ny herinaratra any amin’ny faritra samihafa.

Saika tapitra handrenesana fitarainana avokoa amin’izao fotoana izao ireo renivohim-paritra sy renivohitry ny distrika manerana ny Nosy. Ny tranga farany dia ny hetsika tamin’ny alalan’ny fidianana an-dalambè nataon’ny mpanjifa tany amin’ny tananan’Ankazobe. Tamin’ny 20 janoary teo no nisian’izany fidianana an-dalambè nataon’ny mpanjifa izany tany an-toerana. Olona miisa 150 eo ho eo no tonga nitondra sora-baventy mitaky ny fandefasana ny jiro, teo anoloan’ny JIRAMA any amin’ity tanana ity. “Alefaso ny jiro”, “Aza tapahina intsony ny jiro”. Ireo no hita tamin’izany sora-beventy nentin’ireo mpanao fihetsiketsehana. Araka ny loharanom-baovao dia niteraka fanohintohinana ny fifamoivoizana tany an-toerana mihintsy ny fisian’izany hetsika izany. Vokatr’izany dia nanome baiko ny hifindran’ny hetsika nataon’ny mpanjifa ho teny amin’ny Tranompokonolona ny lehiben’ny Zandary. Teny amin’ny Tranompokonolona arak’izany no nifanazava ny tompon’andraikitry ny JIRAMA tany Ankazobe sy ny vahoaka mpanjifa. Nambaran’ny lehiben’ny JIRAMA tany an-toerana, toy ny efa fandre tany amin’ny toeran-kafa, fa ny fahasimban’ny milina mpamokatra herin’aratra no mahatonga ny fatapatapahan’ny jiro.
Marihina fa eo anelanelan’ny amin’ny 8 maraina ka hatramin’ny 12 atoandro ary amin’ny 5 hariva ka hatramin’ny 12 alina no mandeha ny jiro any Ankazobe.
Nahitana hetsika torak’izany ihany koa tany Antalaha ny 19 janoary lasa teo. Olona manodidina ny 200 no nanao fitokonana teo anolohan’ny tranompokonolona. Naharitra ora roa izany fihetsiketsehana izany. Nitaky ny hanafohanana ny fatapatapahan-jiro ihany koa izy ireo, ary nanome fepotoana hatramin’ny 26 janoary izao mba hitadiavana vahaolana amin’izany.
Ahiana arak’izany ny hahatonga an’ity olana momba ny fatapatapahan-jiro manerana ny Nosy ity ho lasa olana ara-piaraha-monina goavana mihitsy eto amin’ny firenena. Raharaha fatapahan-jiro izay fantatra fa tsy ahitam-bahaolana maharitra hatramin’izao na dia efa nisy aza ny fanamby nataon’izao fitondrana tetezamita izao amin’ny fikarohana vahaolana maharitra momba izany.