Voaroba ny vola 20 tapitrisa ariarin’ny Jovena

23/01/2013

Nitrangana fandrobana indray, omaly tolakandro, tao amin’ny Jovenna ao Ambalabako Ambatondrazaka. Vola mitentina 20 tapitrisa ariary an’ity orinasa ity, saika haterina teny amin’ny Banky no voaroban’ny jiolahy teny an-dàlana. Nodarohan’ireo jiolahy tamin’ny angady teny am-pelatanany ireo izay nitondra izany vola izany, ary nalainy ny vola rehefa avy eo. Efa mandray an-tanana ity raharaha ity ny mpitandro filaminana any an-toerana. Mahazo vahana tanteraka ny fandrobana amin’izao fotoana izao. Ny mpiasan’ny toby mpitsinjara solika tao amin’ny Jovena Ambalabako Ambatondrazaka indray no niharan’izany fandrobana izany,

omaly tokony ho tamin’ny efatra ora sy sasany tolak’andro. Lasan’ireo jiolahy nandritra izany fanafihana izany ny vola mitentina 20 tapitrisa saika harotsaka eny amin’ny Banky BNI. Araka ny loharanom-baovao dia jiolahy roa no nanao izany fanafihana izany, ary tsy nitondra afa-tsy angady iray izy ireo nanatontosany ny fanafihana. Voa niala tsy lavitra akory ny tobin-dasantsy ireo mpiasa roa nirahina handrotsaka ireo vola ireo any amin’ny banky no voan’izao fandrobana izao. Nitaingina “moto scooter” ireo mpiasa ireo izay vehivavy ny iray ary lehilahy kosa ny iray. Nataon’izy ireo tao anaty kitapo tao am-babena ny vola 20 tapitrisa ariary saika haterina eny amin’ny banky. Avy hatrany dia nodarohan’ny iray tamin’ireo jiolahy ireto mpiasa ireto ary rehefa nianjera avy eny ambony moto izy ireo dia nifandrombahan’izy roalahy nalaina ilay kitapo nisy ny vola. Mazava loatra fa nandositra avy hatrany izy ireo raha vao nahazo ilay kitapo feno vola.
Naratra mafy vokatry ny daroka angady nahazo azy ilay tovolahy nitondra ny moto. Naratra fa saingy kely fotsiny ihany kosa ilay tovovavy niaraka taminy. Marihina fa efa nadray an-tanana ny fikarohana ireo jiolahy ny mpitandro filaminana avy amin’ny polisim-pirenena sy ny zandarmariam-pirenena any an-toerana.
Tsara ny manamarika fa saika isan’andro no ahitana vaky trano sy fandrobana ao an-tananan’Ambatondrazaka amin’izao fotoana izao. Tranga iray, ohatra, no niseho ny alin’ny alahady teo tao amin’ny fokontany atao hoe “Podium” any an-toerana. Irony atao hoe “Cyber café” irony no nisy nanafika tamin’io alina io. Lasan’ireo mpangalatra tamin’izany ny fitaovana maro toy ny solosaina tao amin’izany foibe izany.