Tsy novahan’ny UE ny sazin’i Madagasikara

23/01/2013

Nanambara tamin’ny fomba ôfisialy ny Filankevitry ny Governemanta natao omaly teny amin’ny Lapam-panjakana Mahazoarivo ny fanampahan-kevitry ny Vondrona Eropeanina tsy mbola hanala ny sazin’i Madagasikara mifanandrify amin’ny andininy faha 96 ao amin’ny fifanarahan’i Cotounou. Mbola mitohy arak’izany ny fahirano ara-teokarena hampiarin’ny Vondrona Eropeana amin’ny Madagasikara. Midika ihany koa izany fa tsy mbola nahazo fankatoavana tamin’ny Vondrona Eropeana ny dingana vita amin’ny fiverenan’i Madagasikara amin’ny ara-dàlana.

Nandritra ny Filankevitry ny Governemanta izay notanterahina teny amin’ny Lapam-panjakan’i Mahazoarivo, omaly Talata 22 janoary 2013 no nanambaran’ny minisitry ny Raharaham-bahiny fa mbola notohizan’ny Vondrona Eropeana ny fanasaziana an’i Madagasikara noho ny fanitsakitsahana ny andininy faha 96 tamin’ny fifanarahana voasonia tany Cotounou renivohitr’i Benin. Raha atao amin’ny teny hafa dia mbola arak’izany ny sazin’i Madagasikara eo anatrehan’ny Vondrona Eropeana. Sazy izay manapaka ny famatsiana ara-bola avy amin’ity firenena ity tokony ho azon’i Madagasikara, mametra ihany koa ny fifandraisana ara-diplômatika misy eo amin’ny firenena roa tonta.

Amin’ny ankapobeny, raha ny voalaza ao amin’izany andininy faha-96 amin’ny fifanarahan’i Cotonou izany dia takian’ny Vondrona Eropeanina ho fepetran’ny fanampiana omeny ny fananjana ny demokrasia sy ny tany tan-dàlana. Isan’ny voaresaka amin’izany ihany koa ny fametrahana fitondrana tetezamita iaraha-mitantana. Ankoatr’ireo dia isan’ny fepetra voalazan’ny andininy faha 96 ao amin’ny fifanarahan’i Cotounou ihany koa ny Zon’olombelona. Ho an’ny Vondrona Eropeana dia isan’ny ahitana taratra izany ny mahakasika an’ireo gadra politika tamin’ny raharaha 2009. Tamin’ny alalan’ny tatitry ny Parlemantera Eropeanina no nanehoan’izy ireo ny fitakiana ny famoahana ireo gadra politika ireo sy ny famerenana an-tanindrazana ny sesitany rehetra. Voalaza fa ny fampihantonana ny fanampiana rehetra no hitranga raha toa tsy tanteraka izany.
Tsiahivina fa efa nisy ny antso avo izay nataon’ny Praiminisitra Omer Beriziky nandritra ny fanombohana ny fotodrafitrasa hamatsiana herinaratra an’Ampasimbe Onibe, amin’ny alalan’ny reniranon’i Fanifarana. Antso avo izay miantefa amin’ny Vondrona Eropeana ary fangatahana ny tokony hanokafana adihevitra mba handinihana ny tokony hanalana ny sazy ampiharina amin’i Madagasikara, araka ny voalazan’ny andininy faha-8 ny fifanarahan’i « Cotonou ». Ny tanjona, hoy ny Praiminisitra Omer Beriziky, dia ny hamahana ny krizy malagasy, amin’ny alalana fifanarahana, araka ny ambaran’ny andininy faha-96 n’io fifanarahana voalaza eo ambony io ihany.
Azo lazaina arak’izany, fa tsy nankatoavin’ny Vondroa Eropeana izany antso avo nataon’ny Praiminisitra izany. Mbola tsy ampy ihany koa arak’izany ny dingana vitan’i Madagasikara amin’ny famerenana ny ara-dàlana eto amintsika, na dia teo aza ny fisintahan’ny filohan’ny tetezamita sy ny filoha teo aloha tsy ho kandidà amin’ny fifidianana filoham-pirenena.