Tapaka noho ny fitokonan’ireo mpamily

23/01/2013

Nitokona hatramin’ny alatsinainy teo ireo mpiasa mpamily ireony fiara mpitatitra solika irony tany Toamasina. Tapaka efa roa andro arak’izany ny famatsiana solika avy any Toamasina mihazo an’Antananarivo. Fitakiana ny fanatsarana ny tontolon’ny asan’izy ireo no anton’ity fitokonana nataon’ny mpamily fiara mpitatitra solika ity.

Hisy fiantraikany amin’ny famatsiana solika ny faritra hafa an-koatra an’i Toamasina ny fitokonan’ireo mpamily fiara fitaterana solika raha tsy ahitam-bahaolana haingana izany. Io no nambaran’ny mpanjifa nahare ity vaovao mikasika ny fitokonan’ny mpamily fiara fitaterana solika any Toamasina ity. Efa hatramin’ny fiandohan’ny herinandro teo ireto farany no nijanona tsy niasa, araka ny loharanom-baobvao avy any an-toerana. Tsy izay izany fa ireo mpiasa mpitatitra ny antsoina hoe “produits blancs”, ny lasantsy sy ny gazoala ary ny “petrole”. Arak’izany dia efa roa andro izy ireo no tsy nitatitra solika mihazo an’Antananarivo sy ireo faritra hafa.
Ny antony mivantana nahatonga ny fitokonan’izy ireo dia ny fahafatesan’ny naman’izy ireo iray izay voalaza fa noho ny fitaintainan-dava sy “stress” tsy misy fiafarany ary tahotra ny mpampiasa izay tsy mandefitra amin’ny fahadisoana “kely” miseho. Raha ny fanazavana azo izay namafisin’ny taratasy avy amin’ny mpitsabo dia fahatapahana lalan-drà tamin’ny fony sy ny lohany no nahafaty ity naman’izy ireo ity.
Ankoatr’izay dia isan’ny nahatonga ny fahatezeran’ireo mpamily ireo ihany koa ny fanagadrana ny naman’izy ireo iray efa ho iray volana izao. Naiditra am-ponja ao Antanimora io mpamily io taorian’ny “analyse de densité” natao tamin’ny solika nentiny izay nilazaina fa tsy ara-dalana ny solika nentiny. Marihina anefa fa noraisin’ny “logistique petrolier” ihany izany solika izany rehefa tonga teto Antananarivo.
“Hajao ny zonay fa mba olombelona ihany, na mpamily kamiao mpitatitra solika aza”. Io no antson’ireo mpamily amin’izao fitokonana ataon’izy ireo izao.
Ankoatra ireo voalaza ireo dia itarainan’ireo mpamily ihany koa ny fiaraha-monina amin’ny tobintsolika satria na sakafo na trano fivoahana dia tsy azon’izy ireo ampiasaina fa andoavam-bola avokoa eny amin’ny “logistique petrolier”. Omaly tolakandro, dia ireo mpaka ny “jet” sy ny “fuel” no efa niasa, fa ireo mpitatitra ny lasantsy sy ny gazoala ary ny “petrole” kosa mbola nitokona. Araka ny vaova farany dia mandrahona sahady ny handray fepetra henjana ho an’ireo mpamily tsy miasa manomboka amin’ity androany ity ny orinasa.