Manohitra ny fodian-dRavalomanana Marc

24/01/2013

Nandritra ny fanoloran’ny Masoivoho Frantsay ny taratasy manendry azy hiasa sy honina eto Madagasikara no nanambarany fa midera ny fanampahan-kevitry ny filohan’ny Tetezamita amin’ny tsy filatsahany ho fidina filoham-pirenena ireo mpitondra ambony any Lafrantsa. Tsy nasian’ity ambasadaoro ity resaka kosa ny momba ny fisintahan’ny filoha teo aloha. Nambarany ihany koa fa tokony tsy hody Ravalomanana raha tsy efa vita ny fifidianan. Fihetsika izay maneho mibaribary fa tsy mankato ny tondrozotra ary mbola tsy miala amin’ny fitongilanana ity firenena ity.

Samy tsy nanavaka ny filoha teo aloha sy ny filohan’ny tetezamita ireo fianankaviambe iraisam-pirenena toa ny SADC sy ny Vondrona Eropeana ary ireo fikambanana iraisam-pirenena hafa tamin’ny fiderana ny fanampahan-kevitr’izy ireo tamin’ny fisintahana tsy hilatsaka ho fidina filoham-pirenena. Ny mifanohitra amin’izany kosa no nasehon’ny Masoivoho Frantsay miasa sy monina eto Madagasikara izay tsy nanamarika afa-tsy ny fiderana sy ny fankasitrahana ny fisintahan-dRajoelina tamin’ny fifidianana filoham-pirenena. Raha atao amin’ny teny hafa dia toy ny tsy nisy lanjany teo amin’ny fanjakana Frantsay sy ity masoivohony ity ny fanampahan-kevitra nataon’ny filoha teo aloha amin’ny tsy filatsahany ho fidina filoham-pirenena. Iaraha-mahalala anefa fa ny fanambaran’ny masoivoho toy izao dia mitaratra ny hevitry ny firenena izay maniraka azy.
Etsy an-danin’izany dia isan’ny nasongadin’ity masoivoho ity ihany koa fa tsy tokony avela hody eto Madagasikara ny filoha teo aloha raha tsy efa vita ny fifidianana satria mety hiteraka korontana izany. Fihetsika izay mifanohitra tanteraka amin’ny fifanarahana voarakitra ao amin’ny Tondrozotra, ary mifanohitra ihany koa amin’ny fanambaran’ny SADC izay mbola manamafy ny amin’ny fampodina an-tanindrazana ireo sesintany ka isan’izany ny filoha teo aloha.
Mampanahy arak’izany ny fihetsiky ny Frantsay manoloana ny finiavan’ny firenena hiala amin’izao krizy izao. Satria ho azy ireo dia ny fihetsiky ny filohan’ny tetezamita ihany no tena manan-danja manoloana an’izay fialàna amin’ny krizy izay. Tsy nisy lanjany amin’izy ireo kosa na nisintaka na tsia tamin’ny fifidianana ny filoha teo aloha. Ity fihetsiky ny Frantsay ity ihany koa dia midika fa te-hanome lanja bebekokoa an-dRajoelina eo imason’ny Malagasy izy ireo, ary te-hilaza fa i Rajoelina no tompon’ny fanalaidy tamin’ny fivoahana amin’ny krizy. Te-hilaza ihany koa etsy an-danin’izany fa mbola aorian’ny filohan’ny tetezamita hatrany izy ireo.
Marihina fa omaly no nanolotra ny filohan’ny tetezamita ny taratasy manendry azy ho masoivohon’ny fanjakana Fratsay eto Madagasikara ny ambasadaoro vaovao François Goldblatt. Omaly ihany koa ity masoivoho ity no nanolotra ny taratasy manendry azy tao amin’ny Ministeran’ny Raharaham-bahiny Malagasy. Isan’ny nasongadiny nandritra ny famaliana ny fanontanian’ny mpanao gazety ny fandraisany ny soso-kevitra avy amin’ny filohan’ny tetezamita mikasika ny fampifamadihana ny datim-pifidianana ka hampandrosoana ny fifidianana Solombavam-bahoaka.