Nanao soso-kevitra hiadiana amin’ny hala-bato

24/01/2013

Nanatanterka fihaonana tamin’ireo izay mihevitra ny hirotsaka ho kandidà amin’ny fifidianana filoham-pirenena ny ITEM. Nandritra izany fihaonana izany no nampahafantaran’izy ireo ny fitaovana iray izay heverin’izy ireo fa azo antoka kokoa hisian’ny mangarahara sady hanamaivana kokoa ny fikirakirana ny raharaham-pifidianana. Hanao ezaka amin’ny fampahafantarana an’izany fitaovana izany izy ireo araka ny fanambarana nataony, omaly, ary handresy lahatra ireo rehetra voakasiky ny fanatontosana ny fifidianana mba hanekena ny fampiasana azy amin’izany fifidianana izany.

Ny fampiasana ilay “logiciel” vitan’ny manampahaizana Malagasy ary nomena ny anarana hoe “e-fidy” no heverin’ny ITEM fa miantoka iray hisian’ny mangarahara amin’ny raharaham-pifidianana eto Madagasikara. Omaly no nampahafantatra izany “logiciel” izany an’ireo kandidà hilatsaka ho fidina filoham-pirenena ireo mpikambana ao amin’ny ITEM izay nahitana an’ilay manampahaizana ara-piaraha-monina Rabary Paul. Araka ny fanazavan’izy ireo nandritra ny fihaonana natao teny amin’ny hotely Panorama Andrainarivo dia maro ny tombontsoa entin’ny fampiasana izany “logiciel” izany. Ny voalohany dia ny fazoana ny ampahany betsaka amin’ny vokam-pifidianana, ora roa monja aorian’ny fikatonan’ny biraom-pifidianana. Araka ny fanazavana dia tsy mifanalavitra amin’ny fomba fiasan’ny finday ny fampitana ny vokam-pifidianana raha mampiasa ity “logiciel” ity ny mpikirakira ny vokam-pifidianana. Afaka mahazo ny vokam-pifidianana eo no eo ary miaraka amin’ny kandida rehetra ihany koa ny kandidà isan’isany avy. Ankoatr’izay dia isan’ny tombontsoa azo avy amin’ny fampiasana izany ihany koa ny fahafantarana mazava tsara ny biraom-pifidianana rehetra manerana ny Nosy. Marihina fa isan’ny olana niteraka ny fanodikodinana ny vokam-pifidianana teto amin’ny firenena, araka ny fanamarihan’izy ireo ny tsy fisian’ny famaritana mazava tsar any birao fandatsaham-bato. Mbola isan’ny tombontsoa nasongadin’ireo ao amin’ny ITEM amin’ny fampiasana ny e-fidy ihany koa ny fampihenana ny fampiasana olona sy fitaovana hafa toy ny fiarakodia amin’ny fitaterana ny vokam-pifidianana avy any amin’ny fokontany mankany amin’ny Distrika sy ny Faritra. Mihena miaraka amin’izany ihany koa, mazava loatra ny ahiahy amin’ny mety ho fisian’ny fanodikodinana ny safidim-bahoaka.
Nanambara ihany koa ny ITEM fa vonona ny hirotsaka amin’ny fanentanana ny vahoaka amin’ny fisorohana ireo olana mateti-piseho amin’ny raharaham-pifidianana izy ireo. Amin’izao vanim-potoana mialoha ny fifidianana izao no hanatanterahana izany. Fandraisana andraikitra izay hatao amin’ny maha-olom-pirenena ary tsy miandany amina kandida na koa miditra amin’ny ady hevitra politika mimba ny fanatanterahana ny fifidianana. Tanjon’izany fandraisan’andraikitra izany dia ny mba hisorohana ny savorovoro sy ny disadisa mety hateraky ny fifidianana.
Marihina anefa fa mbola handroso ireo soso-kevitra renehtra ireo eny amin’ireo sehatra rehetra mandrify izany ny ITEM, ka isan’ny tsy maintsy hifanantonana ny CENIT sy ny Fianankaviambe iraisam-pirenena.
Tsar any manamarika fa tsy vitsy amin’ireo kandidà izay efa nanambara ny filatsahany ho fidina ho filoham-pirenena no tonga namely ny antson’ny ITEM nandritra ny fihaonana izay nokarakarainy omaly. Nahatonga solo-tena nanatrika izany fihaonana izany ihany koa ny FFKM.