Teratany karana lahy mpanangona taolam-paty

25/01/2013

Nampidirin’ny mpitsara mpanao famotorana any am-ponja vonjimaika ilay teratany Karana izay voaroiroy amin’ny raharaha halatra taolam-paty tany Morombe. Lehilay iray tratra nangalatra taolam-paty ary efa nosamborin’ny mitandro filaminana any an-toerana no nanondro an’ity karana ity izay nambarany fa naniraka azy tamin’izany. Fantatra ihany koa anefa, araka ny loharanom-baovao avy any an-toerana fa efa misy sahady ireo olom-boatendry sy olom-boafidy teo aloha tany amin’izany distrika izany no manao fanelanelanana amin’ny famotsorana an’ity teratany Karana ity.

Any am-ponja amin’izao fotoana izao ilay teratany karana izay voaroiroy tamin’ny raharaha halatra taolam-paty tany Morombe. Ny mpitsara mpanao famotorana tao amin’ny fitsarana any an-toerana no nanapa-kevitra hampiditra an’ity karana ity am-ponja mandram-pahatonga ny fotoana hanatanterahana ny fitsarana azy. Ny loharanom-baovao avy any amin’iny tanana iny no nahafantarana fa ilay lehilahy tratran’ny fokonolona nangalatra taolam-paty no nanondro an’ity Karana ity sy nilaza fa izy no naniraka azy ireo hanao izany asa izany. Raha tsiahivina ny tantara dia fantatra fa efa nosamborin’ny mpitandro filaminana tany Morombe ilay lehilahy tratra tamin’ny halatra taolam-paty voalaza tetsy ambony. Tafatsoaka anefa izy ary andro maromaro taty aoriana vao tsikaritry ny mpitandro filaminana nony tafaverina tao an-tanana ary nitondra karapanondrom-pirenena hafa sy anarana hafa. Nandritra ny fanadihadiana an’ity lehilahy tratra nangalatra taolam-paty ity no nahafantarana fa misy teratany Karana naniraka azy. Raha vao nahafantatra ny fanononana ny anarany tany amin’ny fitsarana anefa ilay karana dia lasa nandositra tany Toliara, araka ny loharanom-baovao ihany. Saingy nandefa fiantsoana azy ny fitsarana tao Morombe ary nilaza fa ho samborina any Toliara ny tenany raha tsy miverina haingana any Morombe. Voatery niverina tany Morombe arak’izany ilay karana ary dia nampidirin’ny mpitsara mpanao famotorana any am-ponja vonjimaika avy hatrany.
Mbola ny loharanom-baovao avy any an-toerana ihany koa no nanamarika fa maro ihany koa amin’izao fotoana izao ny fanelanelanana ataon’ireo olom-boatendry sy olom-boafidy teo aloha tany amin’ity faritr’I Morombe iny izay manery mafy ny fitsarana mba hamotsotra an’ity teratany Karana ity. Hatreto anefa dia mbola mihazona ny fanampahan-keviny ny fitsarana any an-toerana.
Tsara ny manamarika fa efa an-taonany maro no nisian’ny halatra taolam-paty teto amintsika; Saingy nirongatra azy tafapaka amina faritra maro izany amin’izao fotoana izao. Tsy vitsy arak’izany ny fitakiana ny amin’ny hanatanterahana hetsika manokana hiadina amin’izany tranga izany. Hatreto anefa dia mbola tsy nahitam-bokany avokoa izany rehetra izany.