Nitory ny Pds-n’ny kaomina Toamasina

25/01/2013

Tafapetraka ny alarobia 23 janoary, tao amin’ny Polisy misahana ny heloka bevava any Toamasina ny fitoriana avy amin’ny kaomina mikasika ny fahaverezan’ireo fanaka sasantsasany izay natolotry ny Tetikasa Ambatovy. Ahina ho ireo tompon’andrikitra ambony ao amin’ny fiadidina ny tananan’i Toamasina ihany no nahavanona izany halatra izany satria mbola tsy nampiasaina tao amin’ny Kaomina akory ireo entana very ireo. Nivadika ho fanenjehana olo-tsy fantatra ny raharaha entana natolotry ny tetikasa Ambatovy ho an’ny kaomina Toamasina ary noteran’ny filohan’ny Filohan’ny tetezamita haverina any amin’ny nanome azy nohon’ny filazany fa “fako” izany entana izany.

Tsy nampoizina tokoa ny zava-nitranga satria andro vitsivitsy monja taorian’ny nanolorana azy dia haverina any amin’ny tompony tokoa ireo entana ireo. Tao anatin’izany andro vitsivitsy izany anefa dia efa nisy nangalatra sahady ny sasany tamin’izany entana izany. Mpangalatra izay tsy hisalasalana fa nihevitra ny tsy hisian’ny fanakianana avy amin’ny filohan’ny tetezamita ka hamerenana izany entana izany. Fantatra ary fa ny alarobia 23 janoary teo no nametraka fitoriana teny amin’ny polisy misahana ny ady heloka bevava any Toamasina ny filohan’ny delegasiona manokan’ny tananan’i Toamasina. Ny taratasy mitondra ny laharana 019-CU/TOA-I/DS/SG/SCE/13 no mirakitra izany fitoriana izany izay milaza fa mitory olo-tsy fantatra ny Kaomina Toamasina nohon’ny fahaverezan’ny entana “chaises de salon du bureau 2-1-1” tao aminy. Marihina fa araka ny loharanom-baovao hafa dia tsy ireo “chaises de salon du bureau 2-1-1” ireo ihany no very tamin’ireo entan’ny tetikasa Ambatovy ireo fa very ihany koa ny “armoire” sy seza vitsivitsy ary solosaina maromaro.
Tsara ny manamarika fa nandritra ny famerenana ny entana tamin’ny tompony no nahatsikaretana fa misy tsy hita ireo entana natolotry ny tetikasa Ambatovy ireo. Nandalo fanadihadiana mantsy ny famerenana izany entana izany talohan’ny nakan’ny tompony azy.

Tsy isalasalana ny milaza fa miteraka resabe tokoa ao anivon’ny fiadidiana ny tananan’i Toamasina ity raharaha faverezana fanaka ity. Tsy vitsy ny mihevitra fa tsy ireo mpiasa madinika akory no afaka haka izany entana izany, izay vao naterin’ny tetikasa Ambatovy. Ho azy ireo dia ireo tomponandrikitra ambony tao amin’ny kaomina no mety ho nahavita izany halatra izany, indrindra taorian’ny fanakianana nataon’ny filohan’ny tetezamita izay nanome baiko ny hamerenana ny entana. Niova tampoka anefa ny fizotran’ny raharaha satria ny tompon’entana no tonga aloha naka ny entany fa tsy afaka nanatitra izany ny kaomina. Andrasana ary arak’izany ny ho vokatry ny fanadihadiana hataon’ny mpitandro filaminana mikasika ity raharaha ity.