Fanamelohana ho faty

26/01/2013

Mitsingerina androany ny datin’ny 26 janoary na ny alatsinainy mainty, andro nisian’ilay hetsika notarihan’i Andry Rajoelina izay niafara tamin’ny famoizana ain’olona an-jatony sy fanapotehana fananam-bahoaka sy fananan’olotsotra maro dia maro teto Antananarivo. Eta-taona taorian’izany hetsika nahafatesan’olona sy nahapotehana fananan’olona sy fananam-panjakan izany dia mbola inian’ny fahefam-pitsarana tsy jerena ny momba ity ity raharaha ity na dia tokony handray an-tanana izany avy hatrany aza izy ireo. Marihina fa ny fehezan-dàlana famaizana manan-kery eto amin’ny firenena dia mamaritra mazava tsara fa fanamelohana ho faty no miandry ny tompon’andraikitra voalohany amin’ny raharaha tahaka itony, sy ireo rehetra izay mpiray tsikombakomba taminy.

Fanontaniana maro no tonga ao an-tsain’ny Malagasy raha vao tsiahivina ny datin’ny 26 janoary na ny alatsinainy mainty. Isan’ny fanontaniana lehibe indrindra amin’izany ny hoe avela maimaim-poana ve ka ho lasa tsy maty manonta ny tompon’andrikitra tamin’iny raharaha iny? Hatreto tokoa dia tsy asian’ny Fitsarana Malagasy resaka ny momba izany. Raha araka ny tokony ho izy anefa dia mandray ny andraikiny avy hatrany ny Fitsarana rehefa misy vono olona sy fanapotehana fananam-panjakana na fanapotehana fananan’olona toy ireny. Izany hoe tsy tokony hiandry fitorina izy ireo fa avy hatrany dia mampiantra ny fahefana nomen’ny firenena azy mba hitsara ireo izay hita mibaribary fa rangory fototry ny afo nahatonga izany hetsika niafara tamin’ny fahafatesan’olona an-jatony izany. Tsy izany anefa no nitranga fa efa-taona aty aoriana, dia tsy mbola nisy na dia fanadihadiana natao aza.
Ho an’ny mpahay làlana izay tsy mitonona anarana, kanefa naneho ny heviny mikasika an’iny raharaha iny dia sazy fanamelohana ho faty no miandry ny tompon’nandrikitra voalohany tamin’izany raharaha 26 janoary izany. Ny fehezan-dàlana “famaizany” (code penal) no nambarany fa manondro izany. Araka ny fanazavan’ity mpahay lalàna ity ihany dia mendrika ho saziana amin’ny fanamelohana ho faty ihany koa ny mpiray tsikombakomba tamin’ny fanatanterahana an’iny hetsika nahafaty olona iny, indrindra fa ny tompon’andrikitra voalohany tamin’ny fitandroana ny filaminana tamin’izany fotoana izany. “Vono olona niniana natao, fanapotehana fananam-bahoaka, fanapotehana fananan’olona, fitarihana olona hikomy amin’ny fitondram-panjakana ara-dàlana, fanirahana olona handroba fananan’olona tamin’ny alalan’ny fitsofan-drano azy ireo…” Ireo no santionany amin’ireo heloka hiampangana ny tompon’andrikitra voalohany amin’iny raharaha 26 janoary 2009 iny, raha araka ny fanazavan’ity mpahay lalàna ity ihany.
Tsara ny mamptsiahy fa niainga avy eo amin’ny kianjan’ny 13 mai etsy Analakely ny hetsika notarihan’ny Ben’ny tananan’Antananarivo tamin’izany fotoana izany, Andry Rajoelina, ary nihazo avy hatrany an’Anosy izay nanombohan’ny fanapotehana ny Radio Televiziona Malagasy. Mbola niarahan’ny rehetra nandrè sy nahita ihany koa ny fitarihan’I Andry Rajoelina olona nihazo an’Anosipatrana, toerana nisy ny Haino aman-jery MBS, ka nitsofany rano ny vahoaka hanapotika an’io fotodrafitrasa io tamin’izany fotoana izany. Ankoatr’izay dia niparitaka tamin’ny faritra maro ny fandrobana sy ny faty olona izay niarahan’ny maro niaiky fa efa narindran’izay nitarika azy tamin’izany fotoana izany tanteraka. Tsy adinon’ny mpanara-baovao ihany koa fa tsy nandray andraikitra na kely aza ny lehiben’ny foloalindahy tamin’io fotoana io. Azo heverina mihintsy aza fa tsy namela ireo miaramila teo ambany fiadidiana hisakana ny vahoaka tsy hanao ireny fandrobana sy vono olona ireny ny tenany. Antony ilazana tsy amim-pihambahambana fa nisy ny firaisana tsikombakomba tamin’ny fanatanterahana izany fandrobana niteraka faty olona izany.
Tsetsatsetsa tsy aritra no ilazana fa famoriam-bahoaka tsy nisy fazoan-dàlana, fanimbana fananam-bahoaka no nanamelohana telo taona an-tranomaizina an’i Lalatiana Rakotondrazafy sy Fidèle Razara Pierre. Tsy nisy faty olona akory tamin’ny hetsika notarihan’ireo mpanao gazetin’ny Free FM ireo. Azo heverina arak’izany fa mitombina ny heloka fanamelohana ho faty ho an’izay tompon’andrikitra voalohany tamin’ny raharahan’ny 26 janoary 2009. Marihina fa araka ny nambaran’ny mpisolovava ny an-kolafy Ravalomanana dia efa nametraka fitoriana momba ny raharaha 26 janoary teny amin’ny Fitsarana eto an-toerana izy ireo. Tsy nasian’izany fitsarana izany tohiny anefa ny fitoriana nataony. Efa nametraka fitoriana teny an’ivon’ny fitsarana iraisam-pirenena ihany koa izy ireo, araka ny nambarany, saingy mbola mandeha amin’ny dingana samihafa vao mety ho hitsara ity raharaha ity ny fitsarana iraisam-pirenena. Tsy azo tsinontsinoavina ihany koa ny fijoroana vavolombelona nataon’ny Kolonely Charles Randrianasoavina mikasika ity raharaha ity, izay antony iray tokony handrisan’ny Fitsarana Malagasy andraikitra avy hatrany.