Miantso vahoaka any Toamasina androany

22/10/2012

Lasa renivohitry ny tsy fitovian-kevitra i Toamasina amin’izao fotoana izao. Efa herinandro maromaro izao no nahitana hetsika maro samihafa maneho tsy fahafaliana ataona andian’olona na fikambanana na antoko any amin’ity tanana ity. Isan’ny tena nisongadina tamin’izany ny hetsika nataon’ny mponina tany an-toerana izay nitaky ny mangarahara mikasika ny fanarenana ny Lapan’ny tanana. Teo ihany koa ireo mpivarotra tao amin’ny Bazarikely izay tsy nanaiky ny fanerenana hataon’ny fitondrana tetezamita tao amin’izany bazary izany. Mbola isan’ny hetsika nitranga tany amin’ity tanana ity ihany koa ny fitakin’ireo izay very asa tao amin’ny tetik’asa Ambatovy ka nitaky ny volan’izy ireo.

Araka ny loharanom-baovao avy any an-toerana dia hamory vahoaka ao amin’ny Kianja mitafo Soavita ao Analakininina amin’ity androany ity ny antoko “Tsisy miala eto niany” tarihan’i Mandraina Felix. Ity farany izay tsy iza fa ny filohan’ny Comité ad hoc tao amin’ny Antenimieran’ny Varotra sy indostria any Toamasina. Miantso ny vahoakan’I Toamasina, indrindra ireo very asa tao amin’ny Tetik’asa Ambatovy sy ireo tsy mamkasitraka ny fanaovana fitaovana ny vahoaka any an-toerana ity tompon’andraikitra ity mba ho tonga amin’ny fivoriana izay hataon’izy ireo ao amin’ity kianja ity. Hatreto dia tsy mazava ny tena anton’izany fivoriana izany. Tsara kosa anefa ny mampatsiahy fa vao herinandro lasa izay no nitarika vahoaka nandrava ny famindram-pahefana izay saika natao teo aminy sy ny filoha vaovaon’ny CCT ity mpitarika ny fikambanana “Tsisy miala eto niany” ity. Famindram-pahefana izay tsy tanteraka hatramin’izao na dia teo aza ny baiko sy ny fidinan’ny Lehiben’ny Faritra Antsinanana teny an-toerana. Tsy fantatra arak’izany na mbola misy ifandraisany amin’izay fanesorana an’i Mandraina Felix amin’ny toerany izay ity fitarihana vahoaka ity na nohon’ny antony hafa mihintsy.
Marihina fa araka ny fanazavan’ny Filohan’ny delegasiona manokan’ny Tananan’i Toamasina izay nifandray an-telefaonina tamin’ny gazety la Nation omaly dia tsy mbola nahazo alalana hanao hetsika na hamory vahoaka ity fikambanana “Tsisy miala eto niany” ity. Nambarany ihany koa fa mandeha amin’izao fotoana izao ny resaka any Toamasina any ny amin’ny fisian’ny mpanao politika izay ao ambadik’ity raharaha fitarihana hetsika samihafa izay mitranga any Toamasina ity.