Nisy nanapaka ny jiron’ny Katedraly

26/01/2013

Kisendrasendra ve sa fifandrifian-javatra fotsiny ihany? Izay no fanontaniana napetraky ny maro raha nahita fa tapaka tampoka ny herin’aratra tao amin’ny fiangonana Katolika Andohalo rehefa nandray fitenenana nitondra ny hafatry ny FFKM ny filoha vaovaon’izany rafitra izany, ny Arsevekan’Antananarivo, Mgr Odon Marie Arsène Razanakolona. Gaga tamin’izany zava-nitranga izany ihany koa ny tompon’andrikitra amin’ny fikarakarana ny Katedraly izay nilaza fa niantso haingana ny tompon’andraikitra voalohany momba izany kanefa nilaza ity farany fa tsy misy vahaolana azo atao fa miandry ny rariny fotsiny ihany. Marihina fa naharitra 15 minitra teo ho eon y fahatapan-jiro tao amin’ny Katedraly nandritra ity fotoam-pivavahana nametrahana ny filoha vaovaon’ny FFKM ity.

Na izany na tsy izany dia nitohy hatrany ny famakian’ny Arseveka ny fanambarana na dia tsy nisy fanamafisam-peo aza. Fanambarana izay nahitana hafatra miantefa amin’ireo sokajin’olona samihafa eto amin’ny firenena. Ho an’ny mpitondra fanjakana dia namporisika azy ireo hanatanteraka ny adidiny mba hiadanan’ny firenena sy ny mpiray tanindrazana ny FFKM. Namporisika ny mpanao politika mba hahay hifanantona sy hifampihaino ary hifampilaza ny marina ary hankato sy hanatanteraka izay hita fa mahasoa ny firenena ihany koa ny FFKM. Nahazo hafatra ihany koa ny Foloalindahy. Nantsoin’ny FFKM mba hifanantona izy ireo mba hanamafy ny hasina sy ny antso maha-tandroka aron’ny vozona azy ireo. Ho an’ny vahoaka kosa dia niantso azy ireo hifanampy sy tsy ho kivy ny FFKM. Eo ihany koa ny fiantsoana azy ireo tsy ho kivy fa hiankina amin’Andriamanitra ka tsy ho resin’ny ratsy ary hanandratra ny hasin’ny maha-olona.
Nambaran’ny FFKM tamin’ny alalan’ny hafatra novakian’ny Filohany ihany koa fa hanatanteraka fampihaonana ireo vondrona samihafa miisa 170 mahery izay efa nihaona tamin’ny FFKM tamin’ny alalan’ny SEFIP izy ireo ary hatomboka amin’ny fotoana mahatomombana azy izany fampihaonana izany. Mbola mitohy kosa ny Fotoam-pivavahana iraisam-pinana manerana ny Nosy izay efa natomboka ny 23 desambra 2012 teo.
Tontosa omaly ny famindram-pahefana teo amin’ny filoha teo alohan’ny FFKM, ny Mpitandrina Rakoto Endor Modeste sy ny filoha vaovaon’izany rafitra izany, ny Arseveka Odon Marie Arsène Razanakolona. Nampahafantarina tamin’io fotoana omaly tao amin’ny Katedraly Andohalo io ihany koa ny Tonia vaovaon’ny FFKM dia ny Pastora Miha Jean Michel. Tsara ny mampatsiahy fa mifandimby isan-taona amin’ny fitarihana ny FFKM ireo filoham-piangonana efa-tonta ao anatin’izany rafitra izany. Samy tonga nanatrika sy nanome voninahitra an’ity famindram-pahefana omaly ity avokoa izy efatra mirahalahy ireo.