Nanakiana ny fihetsiky ny Frantsay

26/01/2013

Nitondra ny heviny manoloana ny fanambaran’ny masoivoho Fratsay ny Ankolafy Ravalomanana any Toamasina. Araka ny fanambaran’izy ireo dia “miverina amin’ny fitsipahana ny tapakan’ny vondrona iraisam-pirenena misahana an’i Madagasikara indray ny Frantsay. Isan’ny mpikambana ao anatin’izany vondrona iraisam-pirenena misahana ny raharaha Madagasikara izany anefa ny Frantsay. Efa ny fitsabahany tamin’ny fanohanana tamin’ny fomba rehetra ny fanonganam-panjakana ihany koa ny raharaha Malagasy ka mahatonga ny firenena sy ny Malagasy latsaka an-davaka toy izao, nefa mbola tsy miova ihany ny fiteniny na efa tena mijaly noho ny krizy ny vahoaka Malagasy”.

Marihina fa isaky alarobia tolakandro no manao fihaonanam-be ao amin’ny lycee price Ambolomadinika ny mpitarika sy ireo mpikambana ao amin’ny ankolafy ravalomanana isam-pokontany. Mifandinika ny vaovao politika sy ny zava-misy mikasika ny ankolafy ary manomana ny hetsika fanaon’izy ireo isan-kerinandro eo an-tokontanin’ny Magro Tanambao V. Ny alarobia teo dia isan’ny nanomezan’izy ireo valiny ny filazan’ny masohovoho frantsay vaovao, izay nambaran’izy ireo fa “na ho inona no ataon’iny masohivoho frantsay vaovao iny dia tsy manitsy mody an-tanindrazana ny filoha Ravalomanana fa raha tsy tia izany izy no handao an’i Madagasikara mamonjy ny firenena izay azony baikona”.
Mikasika ny filazan’Atoa Rajoelina tao Toamasina nandritra ny fitokanana ny “zava-bita” ny farany herinandro teo, dia nolazain’ireto ankolafy Ravalomanana Toamasina ireto fa “na ho inona ny filazana eto na ho inona, dia tanin’olona manokana ara-dalàna no nalaina an-keriny, ka zon’ny tompon-tany ny maka izany amin’ny fotoana maha mety an’izany, araka ny lalana velona. “Omeo ny vahoaka ny marina fa aza afenina amin’ny zava-bita fotsiny fa izay no nampilentika ity firenena ity tao anatin’ny efa-taona ny krizy politika noho ny lainga ka nanonganam-panjakana teto” hoy ny fanamarihan’izy ireo. Ankoatra izay, dia hanomana hetsika manokana, handrenesana ny fidirana mivanatana hataon-dRavalomanana izay hilaza vaovao, ny ankolafy Ravalomanana Toamasina ny sabotsy tolakandro izao eo an-tokontanin’ny Magro Tanambao V.