« Mbola misy fifandresehan-dahatra rehefa tonga Ravalomanana»

28/01/2013

Nanamafy ny Ankolafy Ravalomanana, tamin’ny alalan’ny olom-boatendry Razafimanantsoa Hanitra fa tsy handray anjara amin’ny fifidianana izy ireo raha tsy tonga ety an-tanindrazana mialoha izany ny mpitarika ny ankolafy misy azy ireo. Nanamafy ihany koa izy ireo fa tsy hangataka « amnistie » ho an-dRavalomanana ny mpanara-dia azy, raha mbola ilay làlana nataon’ny fitondrana tetezamita no mifehy ny fahazoana famotsoran-keloka. Mitaky hatrany ny fiverenan-dRavalomanana an-tanindrazana mialoha ny fanatantarahana ny fifidianana eto amin’ny firenena ny ankolafy Ravalomanana.

Hita taratra izany nandritra ny fihaonana fanaon’izy ireo tetsy amin’ny Magro Behoririka ny Sabotsy lasa teo. Toy izao indrindra ny ampahany tamin’ny lahateny nataon’ny mpisolovava Razafimanantsoa Hanitra manandrify izany fitakian’izy ireo ny fodian’ny filoha teo aloha mialoha ny fanatanterahana ny fifidianana izany. « Ny andininy faha 20 hoy tsy maintsy tanterahina. Ny filoha Ravalomanana Marc efa nilaza fa mody izy aloha vao manendry olona hisolo azy. Misy olona any mamendrofendro antsika hoe ahoana izany ianareo rehetra ireo. Ny antsika dia miandry an’i dada. Raha ny tokony ho izy dia ny 08 febroary izao no tokony handeha ny fiantsoana ny olona hifidy sy fametrahana ny antotaratsy. Dikan’izany hoy izy dia mila ny filoha Ravalomanana Marc hody haingana eto isika. Raha an-terisetra tahaka ny fifidianana tamin’ny 2010 io dia tsy misy dikany. Rehefa tsy tonga eto I dada dia tsy misy dikany izany. Ny zanak’I Dada hoy Me Hanitra dia tsy hanendry tena na hanolotra kandida raha tsy tonga ny filoha Ravalomanana Marc”.
Olon-dRajoelina nifona
Ankoatry ny fiverenen’ny filoha teo aloha dia isan’ny noresahan’ny mpisolovava nandritra ny lahateniny ihany koa ny mikasika ny famontsoran-keloka. Efa misy ny fitoriana nataontsika, hoy izy ary ho hitan’ny havana eo ireo. Natao milamina tsara ny antsika hoy izy ka izay no nampikoropaka azy. Ny sehatra iraisam-pirenena no nilaza taminy ka izay izy vao nilaza hoe omeo amnistia. Izy tenany, hoy Maître Hanitra, mbola tsy nilaza hoe omena amnistia fa ireo namany. Mbola manana porofo any ho any isika hoy izy ary misy olona akaiky azy efa nifona amiko. Ny tenako hoy, Maître Hanitra dia nilaza tamin’io olona io fa ampitaiko any amin’ny filoha Ravalomanana Marc izany fifonanao izany. Ho antsika tsy mampaninona na omeny amnistia na tsia fa isika tsy angataka amnistia ho an’ny filoha Ravalomanana Marc raha iny lalàna nataonareo iny. Raha iny an’ny Sadc iny kosa hoy Me Hanitra dia zavatra hafa iny, fa rehefa miteny ny Sadc hoe omena dia omena. Mazava ny tondrozotra fa vita daholo ny amnistia vao miroso amin’ny fifidianana isika. Ny olona tokony omena izany anefa tsy mbola vita, ny “loi d’amnistie” nataon’ny Sadc no tadiavina. Marihina fa araka ny fanamarihana nataon’ity mpisolovava ity nandritra ity lahateny ity ihany dia mbola hisy fifandresen-dahatra rehefa tonga eto an-tanindrazana ny filoha teo aloha Ravalomanana Marc. Tsy nazavainy kosa anefa na mikasika ny fifidianana na eo amin’izy samy ankolafy Ravalomanana no ipetrahan’izany fifandresen-dahatra izany.