Tsy miasa ny polisy

29/01/2013

Tamin’ny alalan’ny fanambarana no nampahafantaran’ny Polisim-pirenena fa hatramin’izao dia mbola tsy miasa foana ny polisy any Mananjary. Handray ny asany anefa izy ireo rehefa vita ny fanarenana ny Commissariat any an-toerana sy ny famerenana amin’ny laoniny ny fitaovana nopotehan’ny fokonolona tamin’ny taon-dasa. Marihina fa hatramin’ny 24 desambra 2012, fotoana nanafihan’ny fokonolona taorian’ilay ady nahafatesana olona iray tany an-toerana no tsy niasa ny polisy any Mananjary.

Namoaka fanambarana ny Polisim-pirenena. Tamin’ny alalan’izany fanambarana izany no nilazan’izy ireo fa mbola tsy miasa hatramin’izao ny polisy any Mananjary. Toy izao ny votoatin’izany fanambarana izany: “Tsy afaka manao ny asany ny Polisy any Mananjary amin’izao fotoana izao noho ny fahasimban’ny Commissariat de Police any an-toerana sy ny fahapotehan’ny fitaovana ao anatiny. Izany dia vokatry ny trangan-javatra niseho tany an-toerana farany teo. Tsy midika izany fa tsy hisokatra intsony ny Commissariat ary tsy hisy Polisy hiasa intsony any an-toerana fa miato aloha mandrapahavitan’ny fanamboarana sy ny fampitaovana tsy maintsy hatao. Efa mandray an-tànana ny fanarenana sy fampitaovana ny Commissariat ny mpitondra ny tanàna any an-toerana sy ny Minisiteran’ny Filaminana Anatiny ka inoana fa hivaha tsy ho ela ny olana. Tokony hifanentana ny rehetra tsy hiverenan’ny fihetsika mitondra amin’ny fahasimban-javatra toy ireny satria toy ny mandrora mitsilany ihany, ny fananam-bahoaka samba, ny fiantohana ny fandriampahalemana tsy tomombana noho ny toeram-piasan’ny mpitandro ny filaminana simba”.
Tsiahivina fa fokonolona an-jatony no nanafika ny kaomisarian’ny polisy tao Mananjary, antoandron’ny 24 desambra 2012. Nopotehin’izy ireo ny fitaovana rehetra tao an-trano ary navoakan’ny olona teny amin’ny arabe izany. Araka ny loharanom-baovao ihany dia Polisy roa no naratra mafy vokatr’izany fifandonana izany. Olona roa nifamaly teny amin’ny toerana fisotroana ary rafitra ady ka niafara tamin’ny fahafatesan’ny iray tany amin’ny hôpitaly no niantombohan’ity raharaha ity. Voasambotry ny polisy anefa ilay namono nahafaty ary notazonina tao amin’ny kaomisarian’ny polisy mba hanaovana fanadihadiana. Tsy neken’ny fokonolona izany ka izany no nahatonga ny fanapotehana ny tranon’ny komisaria tany an-toerana. Marihina fa voararan’ny lalàna ny fanafihana tobin’ny mpitandro filaminana. Tsy sambany no nisy tranga toy izao manerana satria mirongatra ihany koa ny tsy fahatokisana ny mpitandro filaminana.