Mizotra mankany amin’ny fanemorana ny fifidianana

31/01/2013

Tsy ho tanteraka araka ny daty efa nofaritan’ny CENIT sy ny manampahaizan’ny Firenena mikambana ny fifidianana kasaina hatao eto Madagasikara. Samy efa manomana ny sain’ny rehetra momba izay fanemorana ny fifidianana izay avokoa ny fanambaran’ireo fianankaviambe iraisam-pirenena, raha tsy hiteny afa-tsy ny fanambaran’ny Filankevim-pilaminan’ny Vondrona Afrikana isika. Hisy rahateo, ato ho ato ny fivoriana iarahan’ny CENIT sy ny Fianankaviambe iraisam-pirenena izay vinavinain’ny maro fa hanapahana hevitra manandrify izay fanemorana ny fifidianana izay.

Samy naneho ny ahiahiny amin’ny mety tsy hatratrarana ny datin’ny 8 mai amin’ny fanatanterahana ny fifidianana azo antoka eto Madagasikara ny ankamaroan’ireo mpiara-miombonantoka amintsika. Isan’ny naneho izay mazava ny Vondrona Afrikana tamin’ny alalan’ilay tatitra nataon’ny CPS (Filankevim-pilaminan’ny Vondrona Afrikana), mahakasika ny fivoaran’ny toe-draharaha eto Madagasikara amin’izao fotoana izao. Nambaran’ity rafitra faratampony aty Afrika ity, ao amin’ny andininy faha 57 amin’ny tatitra nataony fa Hisy fiantraikany ratsy amin’ny fanajana ny tetiandrom-pifidianana ny olana ara-bola sy ara-pitaovana sedraina amin’ny fampandehanana ny fifidianana eto Madagasikara. Notsiahiviny fa 71 tapitrisa dolara ny vola ilain’I Madagasikara amin’ny fiatrehana ny fifidianana. Amin’izao volana vitsy mialoha ny datin’ny fifidnana izao anefa dia tsy misy afa-tsy 35 tapitrisa dolara no nampanantenain’ireo mpiara-miombon’antoka amin’i Madagasikara. 27 tapitrisa dolara kosa no anjaran’ny fanjakana Malagasy amin’ny alalan’ny tetibolam-panjakana, hoy ihany ny fanambarana avy amin’ny CPS. Nambarany anefa fa mbola tsy voaloha araka ny tokony ho izy ireo vola nampanantenaina ireo hatramin’izao. Mbola mila 3 tapitrisa dolara alaina amin’ny tetibolan’ny taona 2013 sy 5,3 tapitrisa dolara alaina amin’ny teti-bola amin’ny taona 2014 vao ampy ny vola ilaina. Notsiahiviny ihany koa fa tsy tomombana araka ny naminavinana azy ny fanisana ny mpifidy. Raha nokasaina ho vitaina ao anatin’ny iray volana izany, tamin’ny volana oktobra 2012 dia tsy tanteraka hatramin’izao, araka ny fanamarihan’ny CPS ihany.
Ankoatr’ireo fanamarihan’ny fianankaviambe iraisam-pirenena ireo dia tsy vitsy ihany koa ireo fanambarana sy fanehoan-kevitra izay nataon’ireo mpanao politika sy ireo tompon’andraikim-panjakana izay manambara an-kolaka fa tsy maintsy hihemotra ity fifidianana ity. Omaly, ohatra, dia nanambara ny Minisitry ny Ati-tany Rakotoarisoa Florent fa raha tsy tontosa amin’ny 8 febroary ho avy izao ny famoahana ny fiantsoana ny mpifidy handatsa-bato dia midika izay fa tsy maintsy mihemotra ny fifidianana. Nomarihiny fa araka ny voalaza ao amin’ny andininy faha 35 n’ny lalàna mifehy ny fifidianana dia tsy maintsy hatao 90 andro mialoha ny datim-pifidianana ny fiantsoana ny mpifidy handatsa-bato. Nomarihany ihany koa fa isan’ny mampametram-panontanana amin’izao fotoana izao ny fanentanana ny mpifidy amin’ny fampiasana ny “bulletin unique”. Ankoatr’ireo lafin-javatra notsiahivin’ny Minisitry ny Atitany ireo dia mbola isan’ny mety hampanano sarotra ny fanatanterahana ny fifidianana amin’io daty io ihany koa ny mbola tsy fatanterahan’ireo rafitra sy fepetra sasantsasany amin’ny fampitoniana eto amin’ny firenena. Ohatra amin’izany ny fametrahana ny FFM izay miantoka ny fampiharana ny famotsoran-keloka.