Nopotehina nefa nitazam-potsiny ny Tetezamita

31/01/2013

Potika tanteraka amin’izao fotoana izao ny ampahany betsaka amin’ilay orin’asan’ny fianankaviana Ravalomanana, dia ny Tiko Top sy Mana any Toamasina. Saika isan’andro no ahitana olona manongotra ny fotodrafitrasa sisa tavela amin’izany orin’asa izany. Mitazam-potsiny kosa ireo tompon’andraikim-panjakana any an-toerana manoloana izany fandrobana izany na dia efa nisy aza ny fanampahan-kevitra noraisina tamin’ny taona 2009 izay milaza fa harovana ny fananan’ny Filoha teo aloha. Nijery ifotony ny zava-misy tany an-toerana, omaly, ny olom-boatendry Rakotomanana Gervais.

“Tena niniana nopotehina sy nosimbaina ity orinasa Malagasy an’ny fianakavian’ny filoha Ravalomanana ity. Hita taratra amin’izao fa mbola maro ny Malagasy tsy tia fandrosoana satria na ho inona no ambara dia isan’ny orinasa tena reharehan’ny mpandraharaha Malagasy ny orin’asan’ny filoha Ravalomanana, nefa izao nanaovana antsonjay politika izao”. Izay no nambaran’ny Mpanolontsaina avon’ny Tetezamita, ny Docteur Rakotomanana Gervais raha nijery ifotony ny fahasimbana sy fahapotehana mitranga eo anivon’ny “Tiko Oil Product” na TOP II Toamasina ny alarobia tolakandro. Raha ny zava-misy hita nandritra izany fidinana ifotony iniaraka tamin’ity CST avy amin’ny ankolafy Ravalomanana izany, dia tsy nisy nihangana intsony ireo tafo fanitso tamin’ny orinasa sy ny birao rehetra ary ireo magazay. Ireo karazam-by mitana ny trano sy ireo fitaovana be tao amin’ity orinasa fanadiovana menaka ity ihany koa dia efa tapitra tapaka sy nangalarin’ireo jiolahy “voairaka” avokoa.

Raha itodihana ny tantara nahatonga ny fahapotehana ninian’ny FAT natao tamin’ny orinasan’ny fianakaviana Ravalomanana, dia ny Filan-kevitry ny minisitra notarihan’ny Filohan’ny tetezamita Andry Nirina Rajoelina sy ny Praiminisitry ny FAT, Monja Roindefo tamin’ny taona 2009, no nanapahan’ny minisitry ny Vola tamin’izany fotoana izany sy ny minisitry ny Fitsarana ary ny minisitry ny Varotra, fa halain’ny fanjakana tetezamita ny fananan’ny TOP II sy ny MANA ary ireo varin’ny MAGRO teo amin’ny magazay izay samy tao amin’ny seranan-tsambon’i Toamasina. Izany dia mba “handoavan’ny orinasa Tiko ny trosany tamin’ny fahazoany ‘exoneration’ tamin’ny fanafarana ny menaka sy vary ary ireo varimbazaha nanaovana ny lafarinina”. Niarahan’ny Malagasy nahita ny zava-nisy tamin’ny famarotana ny vary sy ny lafarinina ary ireo ambina menaka voadio sy ireo mbola tsy voadio, izay nananganana komity manokana mihintsy nisahana izany ny taona 2009 – 2010. Isan’ny fanampahan-kevitra noraisina tamin’io fotoana io ihany koa anefa ny fiarovana ny fananan’ny fianakaviana Ravalomanana. Tsy izany no zava-nisy amin’izao fotoana izao fa navela nanjakan’ireo jiolahy andro aman’alina mandrake androany, na ny ny TOP II na ny MANA. Efa ritra sy tapitra namidy rahateo ireo entana tao anatiny, na ireo tratran’ny mpitandro ny filaminana tamin’izany aza mazana votsotra fotsiny rehefa tonga teny amin’ny fitsarana.
Ny vaovao azo teo anivon’ny kaompania ny zandary ny seranan-tsambo ankehitriny no nahafantarana fa efa nahatratra mpangalatra 30 izy ireo nanomboka ny volana oktobra lasa teo ka hatramin’izao ary samy efa miandry ny fitsarana azy ao Ambalatavoahangy avokoa ireo mpangalatra ireo ankehitriny noho ny fiaraha-miasa napetraka tamin’ny lehiben’ny fampanoavana vaovao sy ny ekipan’ny fitsarana. “Raha tsy fitiavana ny filoha Ravalomanana no zava-nisy ny taona 2009, nahoana no nanimbana ny fananan’ny fianakaviany izay notantanan’ny vady aman-janany. Na ho inona koa ambara eto dia orinasa reharehan’ny Malagasy ny vondrona Tiko, ka raha izao fanimbana fananan’olona tsy tiana izao foana no atao, dia an’iza indray izany no manaraka raha tapitra ny tetezamita?...mila fanovana ny toen-tsain’ny mpanao politika tia fahefana be loatra”, hoy hatrany CST Dr Rakotomanana Gervais namarana ny fanazavany nahita ny zava-nisy marina.