Nataon’ny vahoaka fahirano ny Lapan’ny Faritra

01/02/2013

Andro fahadimy amin’ny hetsika nataon’ny vahoaka any Tolagnaro ny omaly. Tapaka avokoa ny fifamoivoizana tao an-drenivohitra Anôsy, nanomboka ny maraina. Isan’izany ny làlana miainga eo amin’ny Kaleta-Hotel, mihazo ny lalana Bazaribe, ny lalana midina any amin’ny Ladoany ka hatrany amin’ny Toby Miaramila (Camp Flacourt). Izany dia vokatry ny sakan-dalana ataon’ny vahoaka mitaky ny hofanesorana amin’ny toerany ny lehiben’ny faritra Anôsy sy ireo mpiara-miasa aminy. Tondroin’ny mpanao fihetsiketsehana ho rangory fototry ny afo amin’ny tsy fatanterahan’ny fitakiana ataon’izy ireo ny lehiben’ny faritra.

Nikatona tanteraka ny biraon’ny Faritra Anôsy ka tsy nisy afaka miasa ireo mpandraharaha nandritra ny omaly tontolo andro. Niveri-maina ihany koa ireo izany nanan-draharaha tamin’ireo birao ireo. Nikantona torak’izany ihany koa biraom-panjakana manodidina ny kartien’ny Bazaribe any an-toerana. Isan’izany ny biraon’ny Fitsarana ambaratonga voalohany, ny biraon’ny Paositra, ny biraon’ny Tahirim-bolampanjanana, ny biraon’ny Telma, ny Biraon’ny Distrika ary ny sampan-draharaham-panjakana maro tany an-toerana. Nanatanteraka hetsika goavana tamin’izany faritra izany ny vahoaka notarihan’ny hetsika Fagnomba izay mitaky ny fialàn’ny Lehiben’ny faritra Anôsy amin’ny toerany noho ity farany tondroin’izy ireo ho sakana amin’ny fitakiana ataon’izy ireo.
Ivon’ny hetsika omaly ny fihaonan’ny filohan’ny Hetsika Fagnomba, Parle Zafinandro, sy ireo vahoaka miaraka aminy tetsy an-daniny, ary ny lehiben’ny faritra sy ireo mpiara-miasa aminy, nontronin’ireo mpitandro filaminana, tsetsy an-kilany. Tanjon’ny Hetsika Fagnomba araka ny nambaran’ity mpitarika ity nandritra ny fihaonana, dia ny fametram-pialan’i Randriatefiarison Guillaume Vénance, lehiben’ny faritra, amin’ny toerany. Tetsy an-daniny, nanaiky hametra-pialana teo anatrehan’ny vahoaka tokoa ity farany, saingy nametraka fepetra ny tenany. Hiala aho, hoy izy, raha toa ka manaiky ny hampitsahatra ny fitakiany ny vola tadiaviny amin’ny QMM ny vahoaka ary tsy hitaky vola intsony sy tsy hanelingelina ny fidiran’ny mpiasa zanaky ny faritra ao amin‘ny orinasa QMM. Nampisendaotra ireo vahoka anefa izany fanazavana izany, izay nambaran’izy ireo fa mampiseho ny tsy fahavonon’ny Lehiben’ny faritra hamaha ny olana. Araka ny fahitan’ny mpanao fihetsiketsehana dia ny tombontsoan’ny orinasa QMM no lahara-pahamehana amin’ny lehiben’ny Faritra fa tsy ny tombontsoam-bahoaka very tany.
Tao anatin’ny filaminana avokoa izany fiaraha-midinika teo amin’ny hetsika Fagnomba sy ny Lehiben’ny faritra izany. Saingy nisy ihany ny indro kely izay saika niteraka fifandonana teo amin’ny samy mpanontrona. Tsy inona izany fa ny fifampihantsiana teo amin’ny fianakavian’ny lehiben’ny faritra sy ireo mpanao fihetsiketsehana. Soa ihany fa tsy lasa lavitra izany fifampihantsiana izany fa nalaky niravona noho ny fifandaminana. Na izany na tsy izany, azo lazaina fa nirava maina ihany ny fihaonana teo amin’ny lehiben’ny faritra sy ireo mpanao fihetsiketsehana. Tsy nisy ny fehin-kevitra n any marimaritra iraisana avy amin’izany fihaonana izany. Milaza ny mbola hanohy ny fampikatsoana ny raharaham-panjakana any an-tampon-tananan’i Tolagnaro kosa ny mpanao fihetsiketsehana, toy izay efa nataon’izy ireo omaly.
Mandeha ihany koa ny resaka, etsy an-danin’izany fa mety hiitatra zavatra hafa izao hetsika izao raha tsy mandray andraikitra ao antin’ny fotoana fohy ny fitondrana foibe. Ny tsy fandraisan’andraikitry ny fitondrana foibe manoloana izao olana izao, hoy ny maro dia efa fanaovana tsinotsinona azy ireo.