Nivoaka ny andiany « Ny Avo »

01/02/2013

Miisa 37 mianadahy ireo mpianatra andiany faha-fito nivoaka omaly tao amin’ny Centre de Formation en Commerce International et Concurrence (CFCIC). Nahavita fiofanana telo volana amin’izay rehetra ilaina mikasika ny asan’ny varotra ivelany izy ireo. Nahavita ny « test d’évaluation », nahavita « voyage d’études » tany Toamasina hijerena ny seranana sy ny orinasa hiarahana miasa. Nandritra ny lahateny izay nataon’ny talen’ity sampam-pihofanana ity, Rasoavelona Victorine, no nilazany fa tsy mitsahatra manatsara hatrany amin’izay tokony ho fandraisany anjara bebe kokoa amin’ny fanampiana ny sehatra tsy miankina eo amin’ny lafiny ara-barotra eto amin’ny firenena ny CFCIC. Porofon’izany ny firosoana ny fanovana ny CFCIC ho ivo-toerana nasionaly ara-barotra. Ao koa ny fikarakarana ny fizarana asa ho an’ny mpianatra. Nambaran’ny Tale Jeneralina Lefitry ny Banky BOA kosa fa ny Bank Of Africa no handray an-tanana ny fanomezana « stage pratique » an’ireo mpiofana enina mendrika indrindra.

Ny Ministry ny Varotra, Olga ramalason kosa dia nanasongadina fa ny fampiroboroboana ny varotra iraisam-pirenena dia anisan’ny politikan’ny Governemanta sy ny Ministeran’ny Varotra ary indrindra ny fanondranana ny entana any ivelany. Nitety fotoantsarotra tokoa ny firenena tamin’iny taona lasa iny, nefa dia tsy nahasakana ny ezaka sy ny fahavononana nananan’ny tompon’andraikitra. Noho izany dia nizotra ara-dalàna ny fanofanana ireo mpiray tanindrazana izay maniry ny hirotsaka amin’ny sehatry ny varotra iraisam-pirenena.


Notsipihan’ny minisitra ihany koa fa izao fanofanana izao dia natao indrindra mba hitsinjovana ny mpandraharaha Malagasy. “Tsy tanjontsika izao toerana misy antsika eo amin’ny varotra iraisam-pirenena izao, ka izany no mampiezaka hatrany ny Ministeran’ny Varotra, ary amin’ny alalan’ny CFCIC izay fitaovana enti-miasa amin’izany ho fanampiana ny mpandraraha eto Madagasikara hamolaka tsara ny fomba amam-panao mifehy ny varotra iraisam-pirenena, ary hananantsika mpandraharaha manana fahaizana bebe kokoa satria tsy fiofanana fotsiny no hisy ao fa fianarana mikasika ny varotra rehetra ka ahafahan’ny mpiofana hamorona orinasa ara-dàlana ho azy samirery”, hoy ny nambaran’ny minisitra.

Nankahery ny CFCIC ihany koa Ramatoa Olga Ramalason, mba tsy handraraka ilo mby an-doha ka hanohy sy hanatsara hatrany ny asa fampiofanana izay iandraiketany mba ho rehareha, tsy ho an’ny Ministeran’ny Varotra ihany fa ho an’ny firenena iray manontolo mihitsy. Ary nirary soa sho ireo rehetra vao nahavita fiofanana ihany koa ny tenany mba hahavita be eo amin’ny asa aman-draharaha izay hosahaniny izy ireo .