Tadiavina hakatona ny Radio Josvah

01/02/2013

Nahazo fampitandremana nisesisesy avy amin’ny Lehiben’ny Faritra Anosy ireo onjam-peo any Tolagnaro ka voakasika manokana amin’izany ny radio Josvah. Taorian’ireo fanehoan-kevitra nataon’ireo mpanao fihetsiketsehana manohitra ny Lehiben’ny faritra sy ny orin’asa QMM tao amin’izany onjam-peo izany no nisian’ny fanenjehana. Mandeha arak’izany ny resaka fa mety hiroso amin’ny fanakatonana an’ity onjam-peo ity ny tomponandraikitra.

Lasibatry ny fanapenam-bava indray amin’izao fotoana izao ny haino aman-jery izay manatanteraka ny asa maha mpitondra tenin’ny rehatra azy any antampon-tananan’i Tolagnaro. Araka ny loharanom-baovao dia nisesisesy tato ho ato ny fandrahonana sy ny fampihorohorona miantefa amin’ireo radio miasa ao amin’izany tanana izany, indrindra taorian’ny famelana ireo vahoaka haneho hevitra mivantana momba ny disadisa eo amin’izy ireo sy ny orinasa QMM. Isan’ny nisongadina indrindra tamin’izany ny fanehoan-kevitra nataon’ny mpitarika ny hetsika Fagnomba. Fanehoan-kevitra izay nisian’ny fanakianana ny fihetsiky ny Lehiben’ny faritra Anôsy izay tondroin’izy ireo ho sakana manoloana ny fitakiana ataon’ny vahoaka any an-toerana. Mbola isan’ny nanamafy izany ihany koa ny famoahan’ny filohan’ny hetsika Fagnomba, Zafinandro Perle, tamin’ny alalan’ny onjam-peo Josvah ny fisian’ny fitoriana mihafina nataon’ny orinasa QMM. Izany hoe nisy andian’olona tondroin’ity orinasa ity ho nanakorontana ny asany ka nametrahany fitorina teny amin’ny Fitsarana.
Manoloana izany dia nambaran’ny tomponanadraikitry ny radio Josvah fa im-betsaka no izy ireo no nahazo fandrahonana vokatr’izany. Misy ihany koa ny milaza fa ho avy any an-toerana mihitsy ny iraka avy amin’ny Ministeran’ny Serasera hanatanteraka ny fanakantonana izany radio izany. Marihina fa efa mianika any amin’ny faha-18 taonany ny radio Josvah amin’izao fotoana izao. Izy no azo lazaina fa iray amin’ireo radio be mpihaino indrindra any amin’ny distrikan’ny Tolagnaro satria maharakotra ny 96% n’ny distrika izany onjam-pe izany. Izao fiheveran’ny fanjakana ny hanakantona ity radio tsy miankina iray ity dia midika ho fanapenam-bava sy fanitsakitsahana ny demokrasia sy ny fanehoan-kevitra makalalaka.