Voatsatoka antsy

02/02/2013

Niharan’ny herisetra ny Talem-paritry ny Mponina Analamanga Rakotonirina Angelo. Teny an-dàlana, raha iny izy nanao fanatanjahan-tena iny, no nisy nanatsatoka antsy avy any aoriana. Ny sandriny havanana no voa tamin’izany. Nitondra basy ireo mpanafika saingy soa ihany fa tsy nampiasain’izy ireo izany basy izany. Manahy mafy ny fisian’ny fifandraisan’izao tranga izao amin’ny ezaka ataony amin’ny fiarovana ireo vahoaka nohon’ny ady tany sy ny fandrodanana trano mahazo azy ireo ity talem-paritry ny Mponina ity. Araka ny nambarany dia nahazo fandrahonana an-telefaonina maro dia maro izy tato ho ato.

Naratra mafy vokatry ny tsatok’antsy izay niantra tamin’ny tenany ny talem-paritry ny Mponia eto Analamanga, Rakotonirina Angelo. Omaly maraina tokony ho tamin’ny fito ora no nitrangan’izany herisetra izany, raha iny nanao fanatanjahan-tena iny ity tompon’andrikitra ity. Teny amin’ny lalana teny Androndra no notafihan’ireo jiolahy miisa telo ny tenany. Nanaraka azy avy aoriana izy ireo ary rehefa teo akaiky dia notsatohan’ny iray tamin’izy ireo antsy ny talem-paritry ny Mponina. Ny hatony no nokendren’ilay mpanafika kanjo kinga ilay notafihana ka tany amin’ny sandriny no niantefa ny antsy maranitra. Nambaran’ny Talem-paritry ny Mponina fa tazan’ny masony ny basyteny am-pelatanan’ireo jiolahy. Soa ihany anefa fa tsy nitifitra azy izy ireo. Saingy raha ny fehetsika nasehony dia efa nivonona ny hamono mihintsy ireo jiolahy ireo, araka ny fahitany azy.

Fandrahonana
Ho an’ity tomponandraikitra ity dia tsy tongatonga ho azy izao tranga izao satria tsy nanendaka na naka zavatra teny aminy ireo jiolahy. Etsy an-danin’izany dia efa imbetsaka ny tenany no nahazo fandrahonana avy amin’olo-tsy fantatra na koa avy amin’olona fantatra izay maniraka azy tsy hiditra amin’ny fiarovana ireo very tany. Tsara ny mampatsiahy fa isan’ireo izay manao ny ainy tsy ho zavatra amin’ny fiarovana ireo mponina ianjadihan’ny fanararaotam-pahefana, indrindra mandrify ny fananan-tany, izay isian’ny fangalarana tanin’olona sy ny fandrodanana tsy ara-drariny ny tranon’olona, ity talem-paritry ny Mponina Analamanga ity. Marihina ihany koa fa isan’ireo tompon’andrikitra nandray an-tanana ny fitarain’ny mponina izay rava trano teto Antananarivo sy ireo very tany tamin’ny toeran-kafa tato amin’ny faritra Analamanga ny tenany. Fihetsika izay nambarany fa nazoany tsy fahavalo maro, indrindra tamin’ireo izay mahatsiaro ho very tombontsoa noho ny fiarovana ny vahoaka.
Marihina fa efa nahazo tatitra momba ity tranga ity ny Minisitry ny Mponina Olga Vaomalala Ramaroson izay nilaza fa handray an-tanana izany.