“Hiteraka korontana ny sosokevitr’i Rajoelina”

02/02/2013

Nokianin’ny iraky ny SADC, Leonardo Simao ny sosokevitry ny Filohan’ny Tetezamita Andry Rajoelina hampifamadika ny datin’ny fifidianana Filoham-pirenena amin’ny datin’ny fifidianana solombavam-bahoaka. Hitera-doza ho an’ny firenena izany araka ny nambaran’ity mpanelanelana ity. Mitaky ny hanomezana fahaleovan-tena tanteraka ny Komisiona mahaleotena momba ny fifidianana amin’ny famerana ny daty hanatanterahana ny fifidianana ihany koa ny tenany.Momba ny fampodiana an-tanindrazana an-dRavalomanana kosa dia efa eo am-pandinihana ny tatitr’ireo iraka miaramila avy amin’ny SADC ity rafitra ity ity rafitra ity amin’izao fotoana izao ary hisy ny fandraisana fanampahan-kevitra manandrify izany. Ireo no isan’ny nisongadina tamin’ny tatitra nataon’ny iraky ny SADC izay namarana ny fandraisana ireo ankolafin-kery sy ny masoivoho vahiny teto amintsika omaly.

Nifarana omaly ny iraka nataon’ny mpanelanelana avy amin’ny SADC, Leonardo Simao izay nivahiny teto amintsika nandritra ny andro vitsivitsy. Namarana ny fakan-kevitra nataony tamin’ireo rehetra izay voakasiky ny krizy eto Madagasikara ny fihaonany tamin’ireo masoivoho miasa sy monina eto Madagasikara. Tamin’izany no nanambaran’ity iraky ny SADC ity fa misy fandrosoana ny toe-draharaha eto Madagasikara, indrindra ny fanatanterahana ny fifidianana. Niansto ny rehetra mba hanaja sy hiady mafy mba hisian’ny fanajana ny CENI-T ihany koa ny tenany. Araka ny fanazavany dia tsy misy afa-tsy ny Komisiona mahaleotena momba ny fifidianana na ny CENI-T no hany afaka mamaritra ny daty sy ny filaharan’ny fifidianana eto amintsika. Ny CENI-T izay nambarany fa ahitana ny solontenan’ireo ankolafy rehetra voakasiky ny famahana ny krizy eto amin’ny firenena, ary rafitra voatondra mazava tsara fa tompon’nandrikitra amin’ny fampandehanana ny fifidianana araka ny tondrozotra. Arak’izany dia tsy misy afaka manova ny datim-pifidianana n any filaharan’ny fifidianana n any mpanao Sonia ny tondrozotra n any andrim-panjakana hafa amin’ny tetezamita, eny fan a dia ny Fianankaviambe iraisam-pirenena aza. Tamin’ny fanazavan’ity mpanelanelan’ny SADC ity ihany koa no nanasongadinany fa loza mitatao ho an’ny firenena ny fanovana ny daty n any filaharan’ny fifidianana izay hatao atsy ho atsy eto amintsika. Hiteraka tsy fahatokisana ny CENI-T izany araka ny nambaran’i Leonardo Simao, ary mety hiafara amin’ny tsy fankatoavana ny vokam-pifidianana izay mety hiteraka krizy vaovao eto amin’ny firenena.
Ny SADC no hanapaka
Noresahan’i Leonardo Simao ihany koa ny mikasika ny fampodiana an-tanindrazana ny filoha teo aloha Ravalomanana Marc. Araka ny fanazavany dia efa eo am-pandinihana ny tatitra nataon’ireo iraka miaramila nalefan’ny SADC teto Madagasikara ity rafitra ity amin’izao fotoana izao. Tsy maintsy ho dinohina akaiky hoy izy ny filazana fa mety hiteraka korontana ny fiverenan-dRavalomanana eto Madagasikara mialoha ny fifidianana. Tsy maintsy hisy arak’izany ny fandraisana fanampahan-kevitra manandrify izany.