Asan-jiolahy, hoy ny polisy

02/02/2013

Olona miisa enina no efa nosamborin’ny mpitandro filaminana avy ao amin’ny polisim-pirenena noho izy ireo voaroiroy amin’ny raharaha fanafihana ny trano fonenan’ny filohan’ny FJKM, ny mpitandrina Rasendrahasina Lala. Niaiky ny heloka iampangana azy ny iray tamin’ireo voaroiroy, araka ny fanambaran’ny polisy. Voasambotra ihany koa ny olona izay voalaza fa namatsy fitaovam-piadiana azy ireo. Tsy misy ambadika politika araka ny nivoizan’ny sasany azy ny raharaha fanafihana ny trano fonenan’ny mpitadrina Rasendrehasina Lala filohan’ny fiangonana FJKM. Izay no nambaran’ny polisy izay nandray an-tananana ny fanadihadiana an’ity raharaha ity. Araka ny fanazavan’izy ireo dia asan-jiolahy iny nitranga iny. Azo heverina ho fanarian-dia ny mpanao famotorana arak’izany ny filazan’ny iray tamin’ireo mpanafika fa nisy naniraka izy ireo.

Etsy an-danin’izany, olona enina no efa voasambotra ary natolotra ny fampanohavana, omaly, noho izy ireo voaroiroy tamin’izay raharaha fanafihana ny tranon’ny filohan’ny FJKM izay. Ny efatra tamin’izy ireo dia voapanga ho nanatanteraka ny fanafihana, ny iray namatsy fitaovam-piadiana an’ireo mpanafika ary ny iray hafa nividy ireo entana nangalarina tao amin’izany fianankaviana izany. Ny 29 janoary lasa teo no voalaza fa voasambotra ny iray tamin’ireo olona izay nanafika. Ity farany izay niaiky tanteraka fa isan’ireo nanafika ny trano fonenan’ity mpitondra fivavahana ity. Tamin’ny alalany no nahafantarana ireo namany hafa. Tamin’ny fisamborana ny iray tamin’izy ireo dia voalaza fa tratra tao amin’ny trano fonenany ilay fitaovana mandeha amin’ny herinaratra izay namelezan’izy ireo ny mpiambina ny tranon’i Pastora rasendrahasina Lala. Tratra tao amin’izany trano izany ihany koa ny marika famantarana ny maha pastora an’ity mpitandritra ity. Marihina fa mbola misy naman’izy ireo hafa mbola tadiavina hatramin’izao.
Ankoatr’izay dia ny fanambaran’ny mpitandro filaminana ihany koa no nahafantarana fa tratra ny olona izay namatsy fitaovam-piadina an’ireto jiolahy nanafika ny tranon’ny mpitandrina Rasendrahasina ireto. Marihina fa nitondra basy ireo jiolahy tamin’izany fanafihana izany.
Tsara ny mampatsiahy fa tamin’ny 15 janoary no nisy nanafika ny trano fonenan’ny Pastora Rasendrahasina. Tranga izay nanehoan’ny Fiangonana FJKM ny firaisankinany tamin’ny alalan’ny fiaraha-mivavaka sy ny fanairana ny fitondram-panjakana manoloana ny firongatry ny tsy fandriam-pahalemana eto Madagasikara.