Hatao lavanty manomboka amin’ny alatsinainy

02/02/2013

Hatao lavaty ampahibemaso ary azon’ny be sy ny maro handraisana anjara ireo entana tsy alain’ny tompony tao anatin’ny enim-bolan’ny taona 2012 tao amin’ny seranan-tsambon’i Toamasina. Amin’ny alatsinainy sy talata ho avy izao no hanatanterahana izany lavanty ampahibemaso izany araka ny fanambarana nataon’ny Tale jeneralin’ny ladoany, Vola Razafindramiandra. Ny ladoany Toamasina sy ny Antenimieran’ny Varotra miaraka amin’ny vadintany mpanao lavanty izay tsy iza fa i Rasamimaka Mahefalahy no mikarakara izany.

Ny fanampahan-kevitra noraisin’ny tale jeneralin’ny ladoany tamin’ny 22 janoary 2013 no mamaritra ny fanatontosana izany lavanty izany. Marihina fa nisy fanovana ireo pitsopitsony amin’ny fampizorana ny lavanty amin’ity indray mitoraka ity. Nambaran’ny tale jeneralin’ny ladoany fa tsy navoaka tamin’ny gazetim-panjakana intsony ny momba ireo ny entana hatao lavanty. Nanaparitaka tamin’ireo biraon’ny ladoany rehetra manerana ny nosy sy tamin’ny alalan’ny tranokalan’ny ladoany ‘www.douanes.gov.mg’ ary ireo gazety mpivoaka isan’andro hita manerana ny nosy kosa anefa ny lisitr’ireo entana ireo. Izany no natao dia mba hisian’ny mangaraharaha tanteraka amin’ny fanatanterahana ny lavanty, hoy Atoa Raminomanana Hajarizaka “receveur”-n’ny ladoany ao Toamasina. Nomarihany ihany koa fa hatao isaky ny alatsinainy sy talata mandram-pahatapitry ny entana ny lavanty. Eo amin’ny faritra malalaka fantatra amin’ny hoe “santatra” ao amin’ny Mictsl no hanaovana lavanty ireo entana anaty kaontenera. Eo amin’ny “parc voitures” an’ny Smmc kosa ny lavantin’ireo fiara, ary eo amin’ny toerana malalaky ny Antenimieran’ny Varotra ireo entana efa eo ampelan-tanany. Nambaran’ny Maître Rasamimaka Mahefalahy fa hiova ny fomba fandraisana anjaran’ireo izay hividy entana mandritra ity lavanty ity. Tsy maintsy misoratra anarana eo anivon’ny CCIT izy ireo ary mahazo ny karatra manokana aorian’ny fandoavana ny saram-pandraisana anjara. Tsy azo ekena intsony ihany koa ny fanomezana fahazoan-dalana manokana olona mpisolo tena azy ny mpividy. Ny fandoavana ny entana lasan’ny mpanao lavanty dia ao anatin’ny 24 ora aorian’ny nazoany izany ary miaraka amin’ny taratasim-bola misy antoka voasonian’ny banky.
Marihana fa miara-miasa akaiky amin’ny Bianco Toamasina izy ireo amin’ity lavanty 2013 ity. Nomarihan’ny “receveur”n’ny ladoany ao Toamasina sy ny vadintany mpanao lavanty, fa “ireo entana mila fanamarihana manokana toy ny sakafo nafarana izay ilàna fanamarinana ara-pahasalamana, sy ny fiara manana familiana havanana izay voaràran’ny lalana eto amintsika ny fampidirana azy, izay ataon’ny olona anaty kaontenera, dia tsy afaka hatao lavanty fa miandry ny valin’ny fanadiadiana manokana tsy atao aminy”. Nambara ihany koa fa ireo entana lafo tsy araka ny vidiny dia afaka hajanon’ny ladoany ny fahazoan’ny olona azy. “Ny entana mbola tsy mandalo lavanty nefa tian’ny tompony havoaka, dia mbola azony alaina”, hoy hatrany izy ireo namarana ny fanazavana amin’ny fomba fiasa vaovao ny ladoany amin’ny fanaovana lavanty 2013.