Nenjehin’ny gasy tany anaty hôtely

04/02/2013

Nanaho hetsika tampoka tao amin’ny Hôtely niantranoan’ny mpanolon-tsaina manokan’ny filohan’ny tetezamita, Ratsirahonana Norbert Lala ireo tera-tany Malagasy monina any Paris afry notarihan’ny GTT, omaly. Saika niafara tamin’ny fidarohana an’ity mpanolontsainan’i Andry Rajoelina ity izany hetsika izany. Voafehin’ireo mpanao fihetsiketsehana ihany anefa ireo mpandray anjara tamin’ny hetsika. Nampanantena ny hijery akaiky ny famoahana ireo gadra politika kosa i Ratsirahonana Norbert Lala.

Tonga tampoka tao amin’ny Hôtely lehibe, IBIS CAMBRONNE, tany Paris, izay nipetrahan’ny mpanolon-tsaina manokan’ny Filohan’ny tetezamita, Ratsirahonana Norbert Lala ireo tera-tany Malagasy notarihan’ny fikambanana GTT France. Omaly tokony ho tamin’ny sivy ora maraina, ora any Paris, no nitrangan’izany hetsika izany. Araka ny loharanom-baovao dia efa vory tao amin’ny toerana iray tao amin’ity hôtely lehibe ity ireo mpanao fihetsiketsehana vao naniraka ny iray tamin ‘izy ireo handondona ny efitrano nisy an’i Ratsirahonana. Nivoaka avy tao ity mpanolon-tsainan’i Andry Rajoelina ity izay nanaiky nidina teo anatrehan’ireo mpanao fihetsiketsehana na dia mbola akanjo mandry aza no teny an-kodiny. Teo no saika tsy tana ireo mpanao fihetsiketsehana satria nisy tamin’izy ireo no efa saika hidaroka avy hatrany an-dRatsirahonana. Nandray andraikitra avy hatrany kosa ny mpitarika ny fihetsiketsehana ka voalamina ihany ireo izay nentin-katezerana tamin’ny fahitana an’ity mpanolon-tsain-dRajoelina ity. Navela hisolo akanjo, avy eo ingahy Ratsirahonana ary nanaiky hifampiresaka tamin’ny mpanao fihetsiketsehana notarihan’ny GTT. Isan’ny fanontanian’ireto farany ny antonym bola tsy ahatongavan-dRavalomanana an-tanindrazana. Araka ny valintenin-dRatsirahonana dia ny SADC no mbola tsy mamela azy hody eto Madagasikara. Nilaza ny hanaitra ny SADC manoloana izany moa ireo mpanao fihetsiketsehana. Mbola isan’ny nametrahan’izy ireo fanontaniana ihany koa ny mikasika ireo gadra politika izay mbola any am-ponja amin’izao fotoana izao. Nampanantena azy ireo ingahy Ratsirahonana fa hitady izay hivoahan’ireo gadra politika raha vantany vao tafaverina aty Madagasikara.
Tsar any mampatsiahy fa nirahin’ny filohan’ny tetezamita tany Frantsa ny mpanolontsainany Ratsirahonana Norbert , niaraka tamin’i Rajaona Anick izay tompon’nandrikitry ny fifandraisana iraisam-pirenena ao amin’ny fiadidiana ny tetezamita. Araka ny loharanom-baovao dia ny handresy lahatra an’ireo mpiara-miombon’antoka amin’ny tokony hampandrosoana ny fifidianana solombavam-bahoaka mialoha ny fifidianana filoham-pirenena no anton-dian’izy ireo. Araka ny vaovao farany dia tsy nahita nahomby izany dian’izy ireo izany.