Olona roa lasan’ny rano

04/02/2013

Isan’ireo nanosika ny fiara nitondra azy ireto lehilahy roa ireto kanjo lasan’ny rano. Teo amin’ny “radier” tao Ambohitoaka, 10 km miala an’i Mampikony no nitrangan’izany. Niakatra be ny rano tamin’io fotoana io fa sarotra tamin’ilay fiarabe nitondra azy ireo ni niampita teo amin’ilay “radier”. Ny asabotsy hariva vao hit any fatin’ilay iray voalohany ary ny alahady maraina kosa vao hit any fatin’ilay faharoa.

Mpandeha miisa roa, samy tanora avokoa, no indray namoy ny ainy ny asabotsy teo vokatry ny fiakaran’ny rano teo amin’ny “radier” teo Ambohitoaka, 10 Km avaratr’i Mampikony, amin’ny lalam-pirenena faha 6. Fiarabe mpitondra mpandeha saika hihazo an’Antsiranana no niarahan’izy ireo. Araka ny efa nambara tetsy aloha dia niakatra ny rano teo amin’ity “radier” ity tamin’ny fotoana nandalovan’ilay fiara. Toy ny fanaon’ny mpamily manoloana ny tranga toy izany dia novonoina ny moteran’ilay fiara ary ny mpandeha rehetra no niangaviana hanosika izany mandram-paha-tafita azy. Nony teny afovoan’ilay “radier” anefa dia voatosiky ny hamafin’ny rano ilay lehilahy iray isan’ireo mpandeha izay nanosika ilay fiarabe. Lasan’ny rano vokatr’izany ny tenany. Niezaka ny namonjy azy kosa ny lehilahy iray izay tsy lavitra azy tamin’ny fotoana nitrangan’ny loza. Ny mifanohitra tamin’izay noheveriny anefa no nitranga satria voasinton’ilay voalohany tany amin’ny ranobe ihany koa ny tenany ka samy lasan’ny rano izy roalahy.
Tamin’ny asabotsy no nitrangan’izany loza izany. Teo no eo dia nanao ny fikarohana teny amin’ny manodidina ireo mpandeha sy ireo olona teo tamin’io fotoana io. Ny harivan’io sabotsy io vao hita tamin’ny toerana tsy lavitra loatra ny nitrangan’ny loza ny vatana mangatsiakan’ilay lehilahy voalohany. Ny ampitson’io, izany hoe ny alahady maraina kosa vao hita teny an-tanimbary ny fatin’ilay lehilahy faharoa. Tonga nizaha ifotony ny zava-misy tany an-toerana ny mpitandro filaminana avy ao amin’ny polisim-pirenena ao Mahajanga.
Tsara ny manamarika fa tsy sambany no nitrangana faty olona toy izao teto amin’ity “radier” ao Ambohitoaka ity, indrindra amin’ny fotoam-pahavaratra toy izao. Araka ny fanazavan’ireo mponina any an-toerana dia saika isan’-taona mihintsy no ahitana olona lasan’ny rano eo amin’izany toerana izany.